Silandele yonke imigudu yezezimali kolwengxoxo kazwelonke: Ramaphosa

IHHOVISI likaMemgameli seliveze ukuthi lilandela yonke imigudu ebekiwe ukwehlisa izindleko njengoba kuzoba nengxoxo ngesimo sezwe kuleli sonto.

Okhulumela uMengameli Cyril Ramaphosa, uMnuz Vincent Magwenya, uthe kulandelwa yonke imigomo ebekiwe yokusebenzisa imali kule ngxoxo ezoba senyuvesi i-Unisa, ePitoli, kusuka ngoLwesihlanu nangoMgqibelo.

Uthe ikomiti eliholwa nguMnuz Paul Mashatile, iPhini likaMengameli wezwe, nezinye izinhlaka lisebenze ngokuzikhandla ukuzama ukuqoqa imali yokubamba isithangami sikazwelonke.

"I-Unisa izobamba le ngxoxo mahhala, ngeke kukhokhwe lutho. Kunezinye izindawo ezitholakele okuzobe kubhungelwa kuzona, ezinye okuzosetshenzelwa kuzona. Imali ezosebenza kule ngxoxo yokuqala iqhamuka kwiNedlac," usho kanje. 

Uthe bathole neminikelo yezinto ezehlukene ezizobe zisetshenziswa kuyona.

"Sikwenze lokhu ngoba sifuna ukwehlisa umthwalo obhekene nohulumeni. Sizoqhubeka nokuhlwaya imali ezinhlakeni ezehlukene."

Uveze nokuthi le ngxoxo iyaqhubeka nakuba kube nokungaboni ngaso linye kwezinye izinhlangano ezigcine zihoxa. 

Imibiko iveze ukuthi ezinye zezinhlangano bezifuna ukuthi ihlehliselwe olunye usuku.

UMagwenya uthe uRamaphosa uthe ayiqhubeke ingxoxo ngoba abantu bayilinde ngabomvu.

"Izinhlangano zithe zizohoxa ekubeni yingxenye yabahleli kodwa zizoqhubeka nokuba yingxenye yayo. Sinxusa abezinhlaka ezehlukene ukuthi baqhubeke babambe iqhaza kulesi sithangami ngesimo sezwe," usho kanje.

Kulo mbuthano kulindeleke izinhlangano ezibalelwa ku-200, eziqhamuka emikhakheni engu-33 ehlukene.

Phambilini kwakunemibiko ethi le ngxoxo izodla u-R700 million, okuyinto eyachithwa nguRamaphosa.