Zibakhalele ababanjwe nenqwaba yezitifiketi zokufa nezokuzalwa kubalwa nezika-matric
AMANYE amakhadi atholwe amaphoyisa ngesikhathi egasela emizini yabasolwa eyosesha
Image: SITHUNYELWE
KUPHELE amahlathi okucasha abesifazane abane baseNtshanga, eCamperdown bebanjwa nenqwaba yezitifiketi zokufa, ezokuzalwa, ezomshado, ezika-matric, izincwadi zodokotela, izigxivizo zasesibhedlela, omazisi nenqwaba yamakhadi asemabhange ahlukene.
Laba basolwa ngenkohlakalo ethinta imali yezibonelelo zakwaSassa nokunye.
Ngokuthola kweSolezwe ngomthombo, abasolwa baboshwe wuphiko lwamaphoyisa oluphenya amacala ahleliwe, i-Crime Intelligence isebenzisana nolwe-Organised Crime ngoLwesibili.
Ngokusho komthombo bonke abasolwa abaneminyaka ephakathi kuka-36 no-44, baboshwe emizini yabo kanokusho eseNtshanga emva kokuseshwa kwayo maqede kwatholakala izinto ezisolisayo.
AMANYE amazibithi aqukethe izinto ezitholwe amaphoyisa ngesikhathi esesha imizi yabasolwa
Image: SITHUNYELWE
Umthombo uthe emzini womsolwa (36) wokuqala nowesibili (30), kutholwe izitifiketi zabashonile ezingu-31, isitifiketi soMnyango wezaseKhaya ebesingabhalwe lutho esisodwa, izitifiketi zokuzalwa ezingu-14.
“Kuphinde kwatholwa nomazisi abangu-34, izithombe zomazisi ezinhlanu, izincwadi zokukhoseliswa kwabokufika (asylum) ezingu-17, amakhadi okuhola izibonelelo angu-14 nezitifiketi zomshado ezintathu,” kusho umthombo othe kubuye kwatholwa namanye amaphepha ehlukahlukene akwaSassa, awoMnyango wezaseKhaya kanjalo nowezeMpilo.
Umsolwa wesithathu (44) kuthiwa utholwe namaselula ayisikhombisa, isitembu esisodwa soMnyango wezeMpilo, omazisi abane, amaphepha akwaSassa amahlanu, izitifiketi zika-matric ezinhlanu namakhadi aluhlaza oMnyango wezeMpilo.
AMANYE amaphepha okukhona kuwo nomazisi atholwe emizini yabasolwa ngesikhathi amaphoyisa esesha
Image: SITHUNYELWE
“Umsolwa wesine (43) utholwe nama-sim card ayishumi, amakhadi asebhange ayisikhombisa, ama-smart shopper cards ayishumi, izitifiketi zokuzalwa ezimbili kanjalo neziliphu zokufaka imali ezintathu,” kusho umthombo.
Uveze ukuthi umsolwa oneminyaka engu-36 usanda kuthenga ngokheshi umuzi obiza uR1,1 million eBisley eMgungundlovu, nemoto iToyota Corolla Cross ngoR400 000.
Uthe basola ukuthi ubugebengu obenziwa abasolwa bubandakanya ukuhola izibonelelo zikahulumeni zabakhubazekile nezokuguga.
“Kutholakale nomazisi babantu asebebadala kanjalo namaphepha odokotela aqinisekisa ukukhubazeka ngokwehlukana,” kusho umthombo.
Uveze ukuthi basola nokuthi abasolwa balekelela nabokufika abakuleli ngokungemthetho ukuthi bathole amaphepha athile njengoba kutholwe izincwadi zokubakhoselisa kanjalo namaphepha anezithupha.
“Sisola nokuthi kukhona nemihlomulo abayithola ngokufa kwabantu njengoba kutholwe nezitifiketi zokushona kwabantu,” usho kanje.
Kwenzeka lokhu nje, amaphoyisa ophiko olufanayo ngoJuni kuwo lo nyaka, abopha owesifazane waseMid Illovo ngezinsolo ezifanayo.
Umsolwa watholwa nenqwaba yamakhadi asebhange okwavela ukuthi ubelokhu ehola ngawo izibonelelo zakwaSassa kusuka ngo-2013.
Lo wesifazane kwavela ukuthi unemizi emithathu yemali eshisiwe okuthiwa ikhokhelwe yaqedwa.
Okhulumela amaphoyisa KwaZulu-Natal, uColonel Robert Netshiunda, uthe amaphoyisa aseNtshanga abophe abasolwa abane ngamacala okukhwabanisa emva kokuba betholwe namakhadi akwaSassa, awasebhange, izitifiketi zokuzalwa nomazisi.
"Abasolwa baboshwe ngoLwesibili eNtshanga," kusho uNetshiunda.
Uthe bekulindeleke ukuthi abasolwa bavele eNkantolo yeMantshi yaseCamperdown izolo.