AmaRoma nemisa lokuhoxisa isiqalekiso phezu kwesizwe sakwaMuthwa
UFATA Nkanyiso Muthwa obehola inkonzo yemisa
Image: SITHUNYELWE
ISIZWE sakwaMuthwa sesikuchaze njengokuqala kwesibani esiletha ukukhanya ukuhoxiswa kwesiqalekiso phezu kwalesi sizwe esabe sibekwe yibandla lamaRoma aKhatholika.
Lokhu sikusho ngemuva kokuba kade kunendumezulu yemisa ebihlanganisa ibandla lamaRoma Akahatholika nabakwaMuthwa ebikade iqhubeka eSt Joseph, eMarriannhill.
ABAKWAMUTHWA ebebekade behambele inkonzo yeMisa. Kusuka kwesokunxele uNksz Nombuso Muthwa, Mnuz Mthokozo Muthwa, Nkk Nomusa Gumede (umaMuthwa), uMnuz Hotty Muthwa kanye noNkk Mdletshe (umaMuthwa).
Image: SITHUNYELWE
Kuvela ukuthi ukhokho wesizwe sakwaMuthwa osalala kobandayo uMabhabha Muthwa kukhona iphutha elikhulu alenza nelaholela ekutheni ibandla lamaRoma lehlise isiqalekiso kuyena kanjalo nakusona sonke isizwe sakhe.
ABAKWAMUTHWA bebephume ngobuningi babo beze enkonzweni yeMisa
Image: SITHUNYELWE
Le nkonzo ibikade ihanjelwe ngabaphristi abehlukene bebandla lamaRoma Akhatholika kanjalo nezindimbane zabakwaMuthwa.
Obehola leli misa nguFata Nkanyiso Muthwa ochaze leli misa njengebelibalulekile kakhulu.Uthe kuyajabulisa kahulu ukuthi ekugcineni lezi zinhlangothi zikhumelene umlotha kwehliswa nesiqalekiso.''Ngemuva kwalelo phutha ibandla lamaRoma labe selihlisa isiqalekiso phezu kwaso sonke isizwe sakwaMuthwa. Namhlanje ke leli misa liyingqophamlando ngoba lisho ukususwa ngokugcwele kwalesi siqalekiso futhi kusho ukukhululwa kwesizwe sonke,'' usho kanjena.
Ingwevu endala yesizwe sakwaMuthwa uMnuz Sibongisipho Muthwa uthe besibakhathaza kakhulu lesi siqalekiso esabekwa yibandla lamaRoma esizweni.Uthe njengamanje kulokoza inhlansi yethemba ngokuthi kuningi okuzokhanya njengoba lesi siqalekiso sesisusiwe nje manje.
''Leli misa lizoletha ukukhanya kanjalo nokukhululwa esizweni sonke sakwaMuthwa. Kuyasijabulisa nje kakhulu lokhu esikubona kwenzeka namhlanje. Sengathi kungaba kuningi okuhle okuvelayo nokwenzekayo ngemuva kokususwa kwalesi siqalekiso,'' usho kanjena.
Ngemuva kwaleli misa kube nendumezulu yomcimbi lapho obekusindwe khona ngobethole kuhlatshwe izinkomo kukhonjwa ngophakathi.