UGigaba nothula msindo ethweswa ezobudokotela
INJABULO uMalusi Gigaba ethweswa ezobudokotela
Image: X/UJ
UMALUSI Nkanyezi Gigaba uthole indlela enhle yokugeza igama lakhe nokugqiba amahlebezi amabi avezwa ngowayengunkosokazi wakhe ngesonto eledlule. Ibiseyindaba egudwini inkulumo kaNorma Mngoma owanekela izwe amahlazo alo sopolitiki eveza ukuthi wayefana nomlutha wezinhlelo zocansi ezibukela ngisho esebenza.
NgoMsombuluko, izwe livuke nezindaba ezihlukile nezinhle ngale nsizwa edabuka eShowe, kuvela ukuthi yona nozakwabo ePhalamende uMmusi Maimane bazothweswa iziqu zobudokotela enyuvesi yaseGoli ngokwezifundo zabo zePublic Management.
UGigaba uneziqu zeBachelor of Pedagogics in Education azithola eNyuvesi yaKwaZulu-Natal azifunda kusukela ngo-1989 kuya ku-1990. Wathola iMaster of Arts Degree in Social Policy kuyona le nyuvesi kusukela ngo-1992 kuya ku-1994.
Ucwaningo lukaDkt. Malusi Gigaba lucubungule indima yezinkampani zikahulumeni ikakhulukazi i-Eskom ne-Transnet, ekufezeni izinjongo zezohwebo nentuthuko.
Luhlole umthelela wesipiliyoni samazwe ngamazwe ekusebenzeni ngempumelelo kwama-SOE, uhlaka lwenqubomgomo esebenzayo, futhi lwahlonza izingqinamba ezithiya inqubekelaphambili. .
Okutholakele kubonise ukuthi ama-SOE angathuthukisa amandla oMbuso ngezohwebo ezisimeme kanye nezinjongo zentuthuko. Kodwa-ke, kutholakale ukuthi i-Eskom neTransnet bathwale kanzima ukufeza izinhloso zombili zentuthuko yezenhlalakahle nezomnotho, ngenxa yokugxambukela kwezombusazwe kanye nokuchema emsebenzini wabo. Ucwaningo luphakamise ukuthi kube nokuphatha okuhle e-Eskom naseTransnet ukuze kuthuthukiswe ukukhula okusimeme. Ithimba elizimele kufanele lengamele ukubusa kwabanikazi bamasheya kanye nokuqapha ukusebenza koMbuso, lihlukanise ubunikazi, ukuphatha, nokulawula ama-SOE.