Kuboshwe abangaphezu kuka-300 ngamacala athinta ukuvukuza ngokungemthetho
ABANYE babasolwa ababoshelwe ukuvukuza ngokungemthetho
Image: Sithunyelwe
AMAPHOYISA abophe abasolwa abangu-388 ezifundazweni ezahlukene selokhu kuqale inyanga ngamacala athinta ubugebengu bokuvukuza ngokungemthetho.
Abasolwa baboshwe ngaphansi komkhankaso osabalele izwe iVala Umgodi.
Baboshelwe amacala okuvukuza ngokungemthetho namanye athinta ukuphatha iziqhumane ngokungemthetho, ukutholakala nezibhamu ezingekho emthethweni, impahla okusolakala ukuthi yebiwe nokuphatha ngokungemthetho okuthwala igolide.
Ugandaganda, iloli nama-generator okushaqwe amaphoyisa kwabebevukuza ngokungemthetho
Image: Sithunyelwe
Zine izibhamu ezingekho emthethweni ezishaqiwe, izinhlamvu ezingu-36, izimoto eziyisikhombisa, amaloli angu-13 nogadaganda ababili, ama-pendukas angu-166 nama-generator angu-43.
Okhulumela amaphoyisa uLieutenant General Vincent Mukhathi uthe umkhankaso ngowaphakathi kukaJulayi 1 noJulayi 13.
Uthe ngoJulayi 7 kuboshwe abasolwa abayisithupha abaneminyaka engu-18 no-27 eBoksburg ngokutholakala nezinto ezisetshenziswa emayini.
EFree State kuboshwe abangu-87 abakuleli ngokungemthetho abatholakale nezibhamu ezingekho emthethweni nemishini yasemayini. Kuboshwe nabanye abahlanu abaneminyaka ephakathi kuka-27 no-29 ngokutholakala nezibhamu ezingekho emthethweni.
ENorthern Cape kuboshwe abangu-15 ngamacala okuvukuza ngokungemthetho nomunye oneminyaka engu-23 oboshwe eSamaria ngecala elifanayo.
Amaphoyisa aphinde abopha abanye abathathu eSabie, eMpumalanga.
Abanye baboshwe eNorth West naseLimpopo.