Uhlanze iqiniso omunye obanjwe entshontsha udizili kamasipala
ILOLI likaMasipala weTheku okuboshwe umshayeli walo ngezinsolo zokweba udizili eHammarsdale. Isithombe: SITHUNYELWE
Image: Isithombe: SITHUNYELWE
SABELO MBATHA
KUTHIWA uhlanze lonke iqiniso umsebenzi wophiko lwezamanzi kuMasipala weTheku oboshwe ngoLwesihlanu, ngezinsolo zokweba udizili okuthiwa ubewukhipha elolini lamanzi abelishayela.
Umsolwa osevelile enkantolo, uboshwe amaphoyisa esemzini wakhe eHammarsdale, nezigubhu ezingamalitha awu-25 eziwu-21 ebezigcwele udizili. Kuthiwa uzivumele yena ukuthi sekunezinyanga ezintathu enza lo mkhuba osudle umasipala imali elinganiselwa ku-R 900 000.
Umqondisi weCity Integrity and Investigations Directorate, uMnuz Jimmy Ngcobo, ukuqinisekisile ukuboshwa kwalo msolwa nokuthi uzivumele ukugila lo mkhuba.
"Lesi isenzo esicacile sokuphikisana nemizamo yethu yokulwa nomkhonyovu nenkohlakalo. Umsolwa uvumile ukuthi uyazi ngabanye abashayeli bamaloli amanzi ababanjwe bentshontsha udizili emalolini amanzi kamasipala," kusho uNgcobo.
Ekuqaleni kwale nyanga, kuboshwe abasebenzi bakamasipala ababili eMbumbulu ngamacala afanayo. NgoJuni nonyaka, kubanjwe oqotsheni owesilisa obezenza umsebenzi kamasipala efaka udizili egaraji okwetha kulo izimoto zomkhandlu.
Esinye isigameko esenzeke ngoMeyi, kubanjwe abasebenzi ababili bakamasipala emzini othile bethulula udizili kanti omunye uboshwe ngoFebhuwari, emva kokuba ilungu lomphakathi lihlabe umkhosi.
Ezinyangeni ezidlule, abasebenzi abaningi bakamasipala babanjwe bentshontsha udizili ezimotweni zomkhandlu bezowudayisa. Ngenyanga edlule, kwabikwa ukuthi izisebenzi zikamasipala ezimbili zaboshwa emva kokubanjwa zintshontsha udizili okwakufanele usetshenziswe wumkhandlu.
Umasipala wakuqinisekisa ukuthi baboshwa eKukhanyeni, ngaseVerulam, emva kokuba abaphenyi belandele imibiko ngokusolisayo okuthinta amaloli athwala amanzi kamasipala. Elinye iloli lamanzi likamasipala labanjwa lithulula udizili emzini othile ngesikhathi elinye limi ngasesangweni lawo lo muzi. Kuthiwa lawa maloli ayethwele amanzi okwakufanele ayiswe emiphakathini.
Ezinyangeni ezinhlanu ezidlule, kwabikwa ukuthi ukuthuthwa kwamanzi kwamiswa ngenxa yokushoda kukadizili edepho yase-Ottawa. Ababili ababanjwe kuleli sonto baboshwe eMbumbulu.
UNgcobo uthe abanye abasebenzi basembhidlangweni wokuqumba phansi umasipala ngakwezezimali, wagcizelela ukuthi uphiko lwakhe luphenya amacala ahlukene okweba okuhlanganisa udizili, ukhonkolo, amabhethri ezimoto, usimende, amaphepha, umkhonyovu wokuthengwa kwempahla nokunye.
Ubonge umphakathi ngokuhlale uqaphile nokubika izigameko zomkhonyovu wengeza ngokuthi umasipala usuthathe isinqumo sokungawubekezeleli umkhonyovu nenkohlakalo. Izakhamuzi ziyanxuswa ukuba zibike umkhonyovu nenkohlakalo kwethi: 0800 20 20 20 noma uthumele ku: [email protected]