Basabisa ngokulimisa nse izwe abeseka uMkhwanazi

ZISABISE ngokhukhulelangoqo wesiteleka sikazwelonke izinhlangano ezehlukene ezigcwale izitaladi zeTheku izolo, zimashela ukuthi kuhlukanwe phansi noKhomishana wamaPhoyisa kwaZulu-Natal, uLieutenant General Nhlanhla Mkhwanazi. 

Le mashi ebihlelwe yinhlangano uMnotho Wabansundu Group, ibihanjelwe nangezinye izinhlaka okukhona kuzo abefundisi, abezinhlaka eziqaphe ubugebengu emphakathini (ama-neighbourhood watch nabamaCommunity Policing Forum ezindawo ezehlukene), abeMarch and March (inhlangano elwa nabokufika abakuleli ngokungemthetho), uMkhonto weSizwe Party (MKP) nezinye. 

Imashi ebihanjelwe yizinkulungwane zabantu, iqale enkundleni yezemidlalo iCurries Fountain, emakethe, yaze yayophelela eHoy Park, ngasemahhovisi ayikomkhulu lamaphoyisa esifundazweni.

Omunye wabahleli bemashi, uMnuz Vincent Mdunge, uthe uKhomishana wamaPhoyisa kuzwelonke, uLt General Fannie Masemola, akaqinisekise ukuthi uhlu lwabo lwezikhalazo luyafinyelela "esigebengwini esiphethe izwe". 

Uthe uMengameli Cyril Ramaphosa bamnika izinsuku ezingu-14 ukuba aphendule ohlwini lwabo lwezikhalazo.

Phakathi kwamaphuzu abawabekile, uMdunge uthe bafuna uRamaphosa abamise bonke emsebenzini abathinteka ezinsolweni zikaMkhwanazi.

“Wephuliwe uMthethosisekelo, othi akufanele i-portfolio eyodwa ibe nongqongqoshe ababili. Umengameni uwuphulile uMthethosisekelo,” kusho uMdunge.

Uthe phakathi kwezinto abafuna zenzeke ukuthi kubuyiswe iPolitical Task Team, athe "ibulewe oSenzo Mchunu".

Uthe bayakuchitha ukuqokwa kukaSolwazi Firoz Cachalia.

“Unomlando omubi wokuhola. Ngesikhathi esanguMphathiswa eGauteng. Wasolwa ngokubandakanyeka enkohlakalweni yethenda lezigidigidi zamarandi. Igama lakhe alikaze ligezeke kulezi zinsolo kuze kube namuhlanje,” usho kanje.

Ilungu lomphakathi, uNksz Sinothile Ngcobo, lithe bazibandakanye nemashi ngoba bacabangela ikusasa lezingane zabo.

“Baphikisana kanjani noMkhwanazi ngoba indlela asebenza ngayo, ubugebengu akabubheki,” kusho uNksz Ngcobo.

Uthe bazothi akuhlukanwe phansi noMkhwanazi, wathi bona bewumphakathi akukho olubi abalubonayo kuye, kanti enkulumweni kaMkhwanazi basala bedumele, bebona nokuthi iqiniso alikho eNingizimu Afrika.

Uthe bafisa iphinde ivuselelwe inkontileka yakhe uma isifike ekugcineni, wathi ngesimemezelo sikaRamaphosa ngeSonto, baphoxekile.

“Thina besizitshela ukuthi uzokhipha izinqumo sokuthi abaxoshe abantu abasolwa ngobugebengu, angasho ukuthi ubayisa ekhefini,” usho kanje.

UMasemola, amukela uhlu lwezikhalazo unxuse umphakathi ukuthi uqhubeke nokuziphatha kahle uma wenza amamashi eseka uMkhwanazi.

“Nganelisekile ngendlela eniziphethe ngayo. Niziphethe kahle. Nihlale niziphethe kahle kanje. Ayikho into elungiswa ngokulwa,” kusho uMasemola.

Wethembise ukuthi uhlu lwezikhalazo zabo uzoluhambisa ehhovisi elifanele, wathi amaphoyisa ayaqhubeka nokwenza umsebenzi wawo, wanxusa umphakathi ukuthi uqhubeke nokuweseka.