Iyalakanyana eyenduduzo ngokushona kuka-DD Mabuza

INGENA ingenile imiyalezo yenduduzo emndenini wowayeyiPhini likamengameli wezwe uMnuz David Dabede Mabuza.

Amaqembu ahlukene abhonge emswanini edlulisa amazwi enduduzo nakwi-ANC, ngokushona kwalo mholi obebuye abe neziqubu zokugula nangesikhathi eseyiphini likamengameli.

UMabuza (64) waseMpumalanga kuthiwa ushonele esibhedlela eSandton, eGoli izolo kanti amaqembu afana ne-ACDP, BOSA, ActionSA, ATM namanye, adlulise amazwi enduduzo. 

Unobhala jikelele we-ANC uMnuz Fikile Mbalula, uthe bashaqekile ngokudlula emhlabeni kukaMabuza.

Uthe wayezinikele futhi engumuntu ohlale efuna kube nobumbano kwi-ANC nasezweni.

"Sidlulisa amazwi enduduzo emndenini wakhe, kubangani, izihlobo nakubantu bakuleli. Silahlekelwe ngumuntu obethanda izwe lakhe, owayezinikele ekulweleni inkululeko."

UMabuza owasiza umengameli Cyril Ramaphosa wathatha izintambo engqungqutheleni ye-ANC eNasrec ngo-2017 eGoli, embangweni owawushisa phansi phakathi kukaCR noDkt Nkosazana Dlamini Zuma, wanconywa kakhulu njengomholi owayefuna ubumbano kwi-ANC.

Ababeseka uDkt Dlamini Zuma bambiza ngomdayisi njengoba wayezishaya samuntu owayemeseka ukuze angene emandleni kodwa washintsha ngomzuzu wokugcina waseka uRamaphosa. 

Uphinde anconywe ngokusheshe adede inkundla njengoba aphatha ihlandla elilodwa kwesePhini likamengameli. Wadedela iphini elikhona likamengameli nakwesephini likamengameli we-ANC uMnuz Paul Mashatile.

UMabuza wazalelwa ePhola Trust, eMpumalanga, kanti uneziqu zeBachelor of Arts kwiPsychology, zasenyuvesi yakuleli. Wathola isitifiketi sokufundisa eMgwenya College of Education ngo-1985.

Waba nguMphathiswa wezeMfundo eMpumalanga kusuka ngo-1994 kuya ku-1998 futhi engusihlalo we-ANC.

Ngo-2017 wakhethelwa kwesokuba yiphini likamengameli eNasrec ngo-2017 kuya ku-2022.

Waba ngundunankulu waseMpumalanga kusuka ngo-2009 kuya ku-2018 kanti wasula njengelungu lePhalamende ngo-2023.

Wayeteketiswa ngoKati ngoba wayebizwa ngomuntu onempilo eningi njengoba ayehlale eya eRussia eyokwelashwa.