Ikhwelo kuRamaphosa lokuthi axoshe nabanye ongqongqoshe egawula owe-DA
UMHOLI weDA uJohn Steenhuisen ufuna kuxoshwe nabanye ongqongqoshe abangenzi kahle
Image: Henk Kruger / Independent Newspapers
IYAQONGA ingcindezi yokuthi uMengameli Cyril Ramaphosa, axoshe nabanye ongqongqoshe namaphini abo abalandelwa yiphunga elingelihle lenkohlakalo nabaqamba amanga, kulandela ukukhomba indlela iPhini likaNgqongqoshe we-DA, uMnuz Andrew Whitfield, obebhekele uMnyango wezoHwebo, iziMboni nezokuNcintisana.
URamaphosa uxoshe uWhitfield emuva kokuba aya eMelika, ngoFebhuwari, nonyaka, engazange ayithole imvume kuRamaphosa.
Izolo, umemezele ukuthi usemkhombe indlela, kanti i-DA iyaveva ngalesi sinyathelo.
Leli qembu izolo ebusuku, belihlangene lixoxa indaba yokuxoshwa kukaWhitfield njengoba lithe uxoshelwe ukwenza umsebenzi wakhe.
Ekhuluma ePhalamende, umholi we-DA uMnuz John Steenhuisen, uthe uRamaphosa wenze elikhulu iphutha ngokuxosha uWhitfield.
Uthe uWhitfield waxolisa ngokuhamba ngaphandle kokuthola imvume ekubeni wayembhalele kusenesikathi uRamaphosa, ongamphendulanga, ecela imvume yokuthi ahambe.
"Kunabanye oNgqongqoshe beKhabhinethi abathinteka embikweni wokubhozonyelwa ngombuso yildlanzana, nabanye abaqamba amanga ePhalamende kodwa abangaxoshiwe. Asibambeki isizathu amxoshele sona ngoba wayeyokwenza umsebenzi wakhe. Sikholwa ngukuthi amalungu e-DA axoshelwe ukulwa nenkohlakalo. Sifuna silungiswe lesi simo, axoshe nabanye abaseqenjini lakhe," usho kanje.
I-ActionSA ithe akuxoshwe wonke amaphini ongqongqoshe ngoba awukho umsebenzi wawo.
Kwenzeka lokhu nje, kunabanye ongqongqoshe okunengcindezi yokuthi baxoshwe, kubalwa oweMfundo ePhakeme, uDkt Nobuhle Nkabane nabanye.
Okhulumela uRamaphosa, uMnuz Vincent Magwenya, uchithe ukuthi izoshintshwa yonke iKhabhinethi ngokuxoshwa kukaWhitfield. UNgqongqoshe eHhovisi likaMengameli, uNksz Khumbudzo Ntshavheni, uthe akazi ngezinguquko ezizokwenziwa kwiKhabhinethi.
Uthe kwayena uma kuba nezinguquko uyathinteka njengongqongqoshe oqokwe ngumengameli, waveza ukuthi kuyilungelo likamengameli lokuqasha noma ukudiliza ongqongqoshe namaphini abo kwiKhabhinethi.
Udalule nokuthi ayikaqinisekiswa eyesabelomali sika-R700 million sengxoxo kazwelonke.
Uveze ukuthi sizwakele isikhalazo sokuthi inkulu kakhulu le mali ukuthi ingasebenza kuxoxwa ngesimo sezwe.