Baningi ababoshelwe amacala okudlwengula eKZN

KUKHONA nabangu-232 abasolwa ngamacala okudlwengula, kubasolwa abangu-11 600 ababoshelwe amacala ahlukahlukene KwaZulu-Natal, ngenyanga edlule.

Lokhu kuvezwe okhulumela amaphoyisa KwaZulu-Natal, uColonel Robert Netshiunda, esitatimendeni asithumelele abezindaba. 

UNetshiunda uthe kulesi sibalo kukhona nabayishumi ababoshelwe amacala okuzama ukudlwengula.

“Simi kwabangu-161 isibalo salabo ababoshelwe amacala okubulala, kuthi abangu-192 baboshelwa amacala okuzama ukubulala,” kusho uNetshiunda. 

Uthe zingu-287 izibhamu ezingekho emthethweni ezitholwe amaphoyisa, wathi kuzona kukhona ezingu-16 ezinkulu. 

“Abangu-182 baboshelwe amacala ayamaniswa nokubamba inkunzi kuhlonyiwe kanjalo nokudunwa kwezimoto,” kusho uNetshiunda.

Ababoshelwe amacala okushaya, nawokushaya ngenhloso yokulimaza, uthe bangu-2 521. 

“Bangu-417 ababoshelwe amacala okugqekeza imizi yabantu kanjalo namabhizinisi, awokwebiwa kwemfuyo, nokweba izimoto,” kusho uNetshiunda.

Uthe ukubonakala kwamaphoyisa ezivimbamgwaqweni ezindaweni ezehlukene, kuholele ekutheni kuboshwe abashayeli abangu-535, ebebeshayela bedle amanzi amponjwana, abanye besebenzise izidakamizwa.

“Ababoshelwe amacala amayelana notshwala, okufaka phakathi ukubuphuza esidlangalaleni, ukuhweba ngabo okungekho emthethweni, ukubusabalalisa, nokubakha ngokungekho emthethweni bangu-1 161,” usho kanje. 

Uveze ukuthi zingu-709 izikhali eziyingozi ezisuswe emphakathini. Kuzona kukhona imimese engu-637 nobhushu abangu-24. 

Uthe ingu-131 imfuyo etholiwe, kuyona kukhona izinkomo  ezingu-63, izimbuzi ezingu-51 nezinkukhu ezingu-17.

Uthe imikhankaso yamaphoyisa yokulwa nobugebengu usazoqhubeka, wathi babonga nemiphakathi ngokuba wusizo olukhulu emaphoyiseni. 

Uthe olunye ulwazi oludalulwa imiphakathi lulekelela amaphoyisa ukuthi akwazi ukusheshe abambe izigebengu.