Ijaji nesexwayiso esinzima kwelika-AKA
ABAMANGALELWA ecaleni lokubulawa kuka-AKA, kusuka ngakwesobunxele uMnuz Lindokuhle Mkhwanazi, Mnuz Lindani Ndimande, Mnuz Siyanda Myeza, Mnuz Mziwethemba Gwabeni noMnuz Lindokuhle Lindo Ndimande
Image: NOMONDE ZONDI
OYINHLOKO yamaJaji KwaZulu-Natal, iJaji uThoba Poyo-Dlwathi, ukhiphe isexwayiso esiqinile kubameli babamangalelwa kanjalo noMbuso ecaleni kokubulawa kowayengumculi, uKiernan "AKA" Forbes nomngani wakhe uTebello "Tibz" Motsoane.
Abamangalelwa abahlanu kuleli cala, ngoMnuz Lindokuhle Mkhwanazi, Mnuz Lindani Ndimande, Mnuz Siyanda Myeza, Mnuz Mziwethemba Gwabeni noMnuz Lindokuhle Lindo Ndimande, bavele eNkantolo eNkulu yaseThekwini.
U-AKA noTibz badutshulwa babulawa ngaphandle kwesitolo sokudla iWish, emgwaqweni uFlorida, eThekwini, ngoFebhuwari 2023.
Amaphoyisa abuye aveza ukuthi kukhona izelamani ezimbili zakwaNdimande, okungoMnuz Siyabonga Gezane Ndimande noMnuz Malusi Dave Ndimande ezaboshwa eSwatini, okumele zibuye zize kuleli, ukuzojoyina laba abayisihlanu.
Phambilini, uMbuso waveza ukuthi nakuba uphezu kwezinhlelo zokuthi kubuyiswe abamangalelwa abaseSwatini, uzobe uqhubeka nokuqulwa kwecala kulaba abayisihlanu abangaphambi kwenkantolo njengamanje.
IJaji uPoyo-Dlwathi uthe abameli babamangalelwa abayisihlanu kanjalo noMbuso kufanele bazibophezele ekutheni ngeke babe namathizethize uma sekuqala ukuqulwa kwecala ngo-2026.
UNkk Poyo-Dlwathi udalule ukuthi kuzothatha izinyanga ezintathu ezigcwele ukuthi leli cala liqulwe ngonyaka ozayo.
“Abanye bozakwethu abafikelwa isikhathi sokuthatha umhlalaphansi, uma kukhona amacala abawenzayo, angaphelile, kuye kuphoqe ukuthi babuye,” usho kanje.
Ebuka ozakwabo emehlweni, ubatshele ukuthi uma kwenzeka kuba khona isimo esiholela ekutheni bangabi bikho, kuyofanele baqinisekise ukuthi kuba khona obamelayo.
Inkantolo ibuye yezwa ukuthi owayeyibamba lomqondisi wezokuShushisa KwaZulu-Natal, u-Advocate Simphiwe Mlotshwa, ngeke esaqhubeka nokumela bonke abamangalelwa kodwa usezomela ummangalelwa wokuqala uMnuz Lindokuhle Mkhwanazi nowesihlanu, uMnuz Lindokuhle Lindo Ndimande.
U-Adv Paul Jorgensen yena uzomela uMnuz Lindani Ndimande noMnuz Mziwethemba Gwabeni, ngesikhathi u-Adv Mkhululi Nkomo emela uMnuz Siyanda Myeza.
UMbuso, ngomlomo wephini likamqondisi wezokuShushiswa koMphakathi, u-Adv Lawrence Gcaba, uphakamise ukuthi icala lihlehliselwe uJulayi 24, 2025, ukuze kubekwe izinsuku icala elizoqulwa ngazo.
Uqhube wathi bazobe sebekulungele ukuthi kuqhutshekwe ngalolu suku, uJaji Poyo Dlwathi, wabe eselihlehlisela uJulayi 24, 2025.
Ngaphandle kwenkantolo, okhulumela uphiko lwezokushushisa, iNational Prosecuting Authority (NPA) KwaZulu-Natal, uNkk Natasha Kara-Ramkisson, uthe izelamani zakwaNdimande, eziboshwe eSwatini, ziyaqhubeka nesicelo sokubuyekezwa kwes inqumo sokuthi zibuyiswe kuleli.