Intokozo isikole sihlomula ngezinsiza zobuchwepheshe

ABANGABAZI ukuthi uxhaso lwe-Science, Technology, Engineering, and Mathematics (STEM) lab olunikelwe yiSouth African Muslim Charitable Trust (SAMCT), ngokucelwa yilungu lePhalamende ezingeni likazwelonke, uMnuz Imraan Subratie, esikoleni iClarence Primary eGreyville, eThekwini, luzohamba ibanga elide ekusizeni abafundi ngezithinta ezobuchwepheshe. 

Lolu xhaso lwegumbi elinama-khompyutha angu-40 nobunye ubuxhakaxhaka be-technology okudle u- R900 000, livulwe ngokusemthethweni izolo kulesi sikole.

Uthishanhloko wesikole, uMnuz Bheki Shandu, uthe luzoba wusizo esifundweni iCoding and Robotics, esenziwa ngezindlela ezimbili ezehlukene kusuka kwaGrade R kuya kuGrade 7.

Uveze ukuthi iningi lezingane ezifunda kulesi sikole zivela ezindaweni zasemakhaya kanjalo nasemalokishini ngenhloso yokuthola imfundo engcono.

“Uxhaso olufana nalolu lulekelela ukuthi luvale igebe elikhona phakathi kwabantulayo nabadla izambane likapondo. Igebe likhulu kakhulu njengoba kusuka kudala, izindawo zasemakhaya zingathuthuki, kusho uShandu. 

Uthe: “Manje uma abazali bethuma izingane zabo ezikoleni ezifana neClarence, abanikela ngoxhaso kufanele bazi ukuthi uxhaso lwabo luhamba ibanga elide ngoba kuhlomula izingane zasemalokishini nasemakhaya,” kusho uShandu.

Uthe uxhaso lufike endaweni ekahle kakhulu njengoba bekholelwa ukuthi ubuxhakaxhaka bamakhompuyutha ne-technology, kufanele buqale ukufundwa emazingeni aphansi.

“Kuzoba lula noma sebeya ezikoleni ezinamabanga athe thuthu kanjalo naphakeme ngoba bazobe sebenalo ulwazi lokuthi busebenza kanjani,” kusho uShandu.

Uthe abantwana abafunda ngobuxhakaxhaka babasethubeni lokukhetha noma yiziphi izifundo uma befika emanyuvesi.

Uthe uxhaso olufana nalolu luwukuthuthuka komphakathi okuzodala amathuba omsebenzi eminyakeni eminingi ezayo, bese kunciphisa ubugebengu.

Oyilungu lebhodi leSAMCT, uMnuz Chohan, uthe uxhaso lwabo lungukutshala kubaphathi bezwe bakusasa. 

“Ikusasa eliqhakazile ngelalabo abanemiqondo ecijiwe. ICoding and Robotics iyithuluzi lokucabanga, ukucija amakhono kusetshenziswa i-technology okulekelela ekuxazululweni kwezinkinga. Ukuze sikwazi ukubhekana nezinkinga zamanje, sidinga ubuxhakaxhaka be-technology,” kusho uChohan.

USubratie uthe akungatshazwa ukuthi uxhaso lweSAMCT luzoletha uguquko oludingekayo kulesi sikhathi samanje esifuna abantu babe nolwazi bezobuchwepheshe. 

“I-4th IR akuyona into ekude nathi, yinto esifikile. Kufanele siqinisekise ukuthi sibeka isisekelo esiqinile. Ukufundiswa kwabo besebancane isayensi, kuzosiza ngokuhamba kwesikhathi, sebekwazi ukuxazulula izinkinga besebenzisa i-technology,” kusho uSubratie. 

Uthe akulona iqiniso ukuthi i-Artificial intelligence (AI) izoqeda ngemisebenzi, wathi kunalokho, izovula amathuba.

“Abasunguli bezinto ezehlukene bakhona la, i-lab yenu iyinkundla yenu yokudlala, qinisekisani ukuthi niyafunda, nifundisise. Nochwepheshe abakhona, nabo baqala bengazi lutho. Fundani, lokho kuyonisiza noma senikhetha imikhakha enifuna ukuyilandela,” kusho uSubratie.

Umfundi kaGrade 7, u-Azande Zondo (13), uthe uxhaso lubajabulise kakhulu.

“Kuyinto enhle kithina. Ngelinye ilanga sobe sesixoxa ukuthi thina sayifunda i-technology esikoleni sethu,” kusho u-Azande.

Kwabanye abaveze ukuthi balwamukela ngezandla zombili uxhaso kube wumqondisi wesifunda uMlaza kwezemfundo, uNkk Busi Mahlambi.