URamaphosa nenselelo kwabe-ANC kufihlwa isishoshovu se-ANCWL
UMENGAMELI we-ANC uMnuz Cyril Ramaphosa encokola nomengameli wophiko lwabesifazane kule nhlangano uNksz Sisisi Tolashe emngcwabeni wesishoshovu salolu phiko eThekwini ngempelasonto
Image: Sithunyelwe
UPHIKO lwabesifazane kwi-ANC enkonzweni yomngcwabo wephini likamengameli wale nhlangano, uNkk Lungi Mnganga-Gcabashe, eThekwini ngempelasonto
Image: ANC/X
UMENGAMELI we-ANC nezwe uMnuz Cyril Ramaphosa, uphonsele inselelo amalungu ale nhlangano ukuba ahambe ezinyathelweni zikaNkk Lungi Mnganga-Gcabashe ofihlwe ngoMgqibelo obeyiPhini likaMengameli we-ANCWL.
Inkonzo yomngcwabo kaNkk Mnganga-Gcabashe oshone ngoMgqibelo odlule ebise-ICC, eThekwini, ibihanjelwe yizinkumbi zamalungu e-ANC, wubuholi bayo obuphezulu okubalwa noRamaphosa kanye nabadla khezo lunye nayo.
Ethula inkulumo uRamaphosa, uthe: "Njengoba umbutho wethu usalwa nempi yamakhempu ngaphakathi, siyanxuswa ukuhamba ezinyathelweni zakhe. Sinxuswa ukuba sibe ngababumbi, sibe ngabelaphi."
Uveze ukuthi kunenhlansi yethemba ngobumbano kwi-ANC ikakhulu KwaZulu-Natal.
Uthe uNkk Mnganga-Gcabashe wayengumgqugquzeli nomakhi okungaba wukwakha izinhlaka ze-UDF emazingeni aphansi noma ukwakha i-ANC enamandla emva kokuvulwa umlomo. URamaphosa uqhube wathi, uNkk Mnganga-Gcabashe impilo yakhe yonke uyinikelele ukulwela ubunye emiphakathini, ezinhlanganweni nasezweni lakhe.
"Uqabane uLungi Mnganga-Gcabashe wangena epolitikini enesifiso esijulile sokuthula, senkululeko nobulungiswa. Uphile impilo yakhe esebenzela abanye, esebenzela abantu nezwe lakhe," usho kanje.
Uthe nanamhlanje isabalulekile inhlangano eyakhelwe phezu kwempilo yabantu yansukuzonke njengoba yayibaluleke ngesikhathi uNkk Mnganga-Gcabashe esaqala ukugqugquzela izinhlaka zeqembu.
Umdidiyeli wohlaka oluholwa yi-ANC KwaZulu-Natal, uMnuz Jeff Radebe, uthe ukushona kukaNkk Mnganga-Gcabashe kufike ngesikhathi esibi lapho inhlangano imdinga kakhulu kunakuqala njengoba isemkhankasweni wokwakha kabusha, ikakhulukazi KwaZulu-Natal, kulandela ukwenza kabi okhethweni ngonyaka odlule.
"Njengamalungu e-ANC, asiqhubeke sakhe kabusha umbutho wethu, sisebenzele ukubuyisa ubuntu, ubulungiswa emphakathini nokuziphatha kahle kwabantu. Yilokhu uqabane uMnganga-Gcabashe ayekumele," kusho uRadebe.
Unxuse amalungu ale nhlangano ukuba aqhubeke lapho kushiye khona uNkk Mnganga-Gcabashe ukwakha kabusha i-ANCWL. Kodwa, uthe ukuze kwenzeke lokhu kudinga ukuzinikela kwabo bonke abantu.
NgoLwesine enkonzweni yesikhumbuzo kaNkk Mnganga-Gcabashe, owayengumholi we-ANC KwaZulu-Natal, uMnuz Bheki Cele, uhlabe ikhwelo lokuba kuphele ukulwa ngaphakathi kule nhlangano wanxusa ukuba ibuyise amandla ayo eThekwini.
"Ngokudla iTheku siyodla isifundazwe, ngokudla isifundazwe singena kuzwelonke. Ayikho enye indlela esingasho ngayo sithi lala ngoxolo Lungi ngaphandle kokuthi sibuyise iTheku," washo kanje uCele.