Uqanjwe kabusha umasipala obuwaziwa ngeBuhlebezwe eXobho
Iphelile indaba yokuba umhlali waseBuhlebezwe njengoba sekushintshelwe kuJohannes Phumani Phungula
Image: FACEBOOK
UQANJWE ngesishoshovu se-ANC esingasekho uMasipala uBuhlebezwe, ngaphansi kowesiFunda iHarry Gwala. Kusukela lo Masipala oseXobho usubizwa ngeJohannes Phumani Phungula Local Municipality, okuyigama lesigayigayi se-ANC esasidume ngelikaPassfour.
Umcimbi wokushintshwa kwegama ubuthanyelwe wumdidiyeli wohlaka lwe-ANC olujutshelwe ukusebenza KwaZulu-Natal, uMnuz Jeff Radebe, izimeya ezingaphansi kweHarry Gwala, eziphuma eminyangweni kahulumeni eyahlukene, amalungu omphakathi nomndeni kaPhungula.
Eminye imigwaqo yendawo ibivaliwe kwazise bekunemiviliyelo okuhlanganisa neyamaphoyisa. UPhungula odlule emhlabeni ngo-2009, wajoyina i-ANC ngo-1952 ngesikhathi sombhidlango wokulwa nombuso wobandlululo, waphinde waba yivolontiya esasebenza efemini yetiye, iJoko Tea.
Ngo-1959 wajutshwa ngakubo eHlokozi lapho abamba iqhaza elikhulu ukuvuselela umbusazwe emphakathini waphinde wahola imibhikisho eyayilwa nemithetho yamapasi, ikakhulukazi kwabesifazane baseXobho.
Ubambe iqhaza elikhulu ophikweni lwezempi lwe-ANC oselwavalwa, Umkhonto weSizwe. Ngo-1976, ngokuyalelwa yi-ANC, waya sekudingisweni kwathi kamuva waqeqeshelwa ezempi eSoviet Union.
Ekudingisweni ubuye ngo-1993 kanti ngo-2003 waba yilungu lePhalamende kwaze kwaba sekupheleni kwePhalamende lesithathu.
Ekhuluma nabezindaba kulo mcimbi uRadebe uthe bayajabula ukuthi lo masipala uqanjwe ngoPhungula."Siyajabula ukuthi lo masipala uqanjwe ngomunye wethu kwi-ANC futhi owayeyilungu loMkhonto weSizwe eliqavile," usho kanje.