Kuvele inqwaba yezisulu eziqolwe abaseKZN abafunelwa ukubulala ngesihluku eGoli
BAFUNWA uthuli amaphoyisa oBongani Mthimkhulu noPhilangenkosi Makhanya ngamacala okubulala eGoli
Image: Sithunyelwe
SEKUVELE inqwaba yabesifazane eveze ukuthi iqolwe abesilisa ababili baKwaMashu, abebengaphandle ngebheyili ecaleni lokuthumba nelokubamba inkunzi owesifazane, abasolwa ngokubulala uNksz Olerato Mongale, eGoli ngeSonto.
Lokhu kuvezwe okhulumela amaphoyisa kuzwelonke, uBrigadier Athlenda Mathe esithangamini nabezindaba izolo.
Laba basolwa abangoMnuz Fezile Ngubane, Bongani Mthimkhulu noPhilangenkosi Makhanya, bafunwa uthuli amaphoyisa ngaleli cala, kanjalo nangamanye amacala.
UMNUZ Fezile Ngubane
Image: SAPS
UMNUZ Bongani Mthimkhulu
Image: SAPS
UNksz Mongale (30) kuthiwa walandwa owesilisa owayehamba nge-VW Polo emhlophe ngabo-3 ntambama ngeSonto e-Athol, eGoli, okuyilapho abehlala khona.
Isidumbu sakhe satholwa ngabo-5 ntambama ngalo iSonto, eduze kwaseLombardy West, enyakatho yeGoli.
UBrig Mathe uthe ngo-Ephreli kulo nyaka amaphoyisa abopha uMthimkhulu noMakhanya ngecala lokuthumba nelokubamba inkunzi eGoli.
UMNUZ Philangenkosi Makhanya
Image: SAPS
“Iphoyisa elalimatasa nomsebenzi walo wokuqapha ubugebengu, laqaphela iVW Polo esolisayo, okuyiyo le okukhulunywa ngayo manje, layimisa ngenyanga edlule eGoli. Lathola ukuthi kunowesifazane, owayeqeda ukuphangwa wase ethunjwa zabe sezibakhalela,” kusho uBrig Mathe, othe bavela enkantolo baphuma ngebheyili.
Uthe emva kokukhipha kwabo inombolo kaBrigadier Nama, ophenya leli cala, ukuthi noma ubani onolwazi ngabasolwa amthinte, kuqhamuke inqwaba yabesifazane beveza ukuthi nabo babe yizisulu, abasolwa bebayenga ngomshado, bese becindezela indaba yokuthi kuhlanganwe.
“Baveza ukuthi bahlangana kanjani noMthimkhulu noMakhanya ngezikhathi ezehlukene. Kuthiwa basebenzisa indlela eyodwa ukubayenga. Bahlangana nabo enxanxatheleni yezitolo, babacele umshado, bacele ukubakhipha kuyodliwa, bese bebabamba inkunzi,” kusho uBrig Mathe.
Uthe izifundazwe osekuvele ukuthi benza kuzo lo mkhuba yiNorthern Cape, Free State naseGoli.
Uthe bagculisekile ngomsebenzi owenziwe yithimba eliphezulu, elibophele amaphoyisa ezinhlaka ezahlukene eGoli naKwaZulu-Natal kusuka kuvela izindaba zesigameko ngeSonto.
“NgoLwesithathu ithimba linikele KwaMashu lapho obesekuvele ukuthi abasolwa badabuka khona, futhi babalekele khona ngeSonto, emva kokubulala u-Olerato,” kusho uBrig Mathe, othe bawutholile umuzi wakubo koyedwa wabasolwa.
Uthe badlulele endaweni okukhandwa kuyona izimoto ePhoenix, okuyilapho bethole khona iPolo ebebelibheka.
“Ithimba lamaphoyisa lithole ukuthi iPolo linegazi ngaphakathi,” usho kanje.
Uthe bathole ukuthi umnikazi wePolo, nguyise woyedwa wabasolwa.
“Ugcinwe amaphoyisa, ukhombisa ukusebenzisana namaphoyisa amhloma imibuzo ngemoto engaphansi kwegama lakhe, ebandakanyeka ebugebengwini bokubulawa komuntu,” kusho uBrig Mathe.
Uthe kufanele achaze ukuthi uma imoto yakhe ingekho kuye, usuke ethi ikuphi, nokuthi uyazi yini ukuthi ithinteka ezehlakalweni ezehlukene zobugebengu okubalwa nesango-Ephreli sokuthunjwa nokubanjwa inkunzi kowesifazane.
UBrig Mathe unxuse umphakathi ukuthi uqhubeke nokuletha lonke ulwazi olungalekelela ekutheni babanjwe.
Ucele umphakathi ukuthi ungabafihli njengoba befunwa nje, waxwayisa nangokuthi ungazami ukuzibambela ngokwawo ngoba bayingozi.
Uphenyo lwamaphoyisa lwaphambilini luthole ukuthi i-number plate eyayifakwe kwi-Polo eyalanda umufi kwakungeyeToyota Hilux.
Luveze nokuthi ezinye zezimpahla zikamufi obefunda enyuvesi iWits, okukhona kuzo iselula nesikhwama zatholwa zitshingwe eKew, kanti izolo bekunenkonzo yesikhumbuzo sakhe, uzofihlwa ngeSonto eBloemfontein.