Kusize inyanga ngoweqe esitokisini efunelwa awokudlwengula abaseBizimali High
OWESILISA osolwa ngokudlwengula abafundi besikole iBizimali High, eNkandla (Block his face)
Image: SITHUNYELWE
UBANJWE ehostela iDalton eyofuna usizo enyangeni uMnuz Khumbulani Ngubane (28), osolwa ngokudlwengula abafundi baseBizimali High, eNhloshane eNkandla.
UNgubane uvele kafushane izolo enkantolo yasePinetown ngecala lokweqa esitokisini samaphoyisa eMariannhill ngoMsombuluko. Okwamanje kuthiwa uzogcinwa esitokisini esiteshini samaphoyisa eDurban North kanti wenqatshelwe ibheyili. Uzobuyela enkantolo yasePinetown ngoMeyi 28.
Ngezinsolo zamacala okudlwengula eBizimali kuthiwa uzovela ngawo eNkandla.
UNdunankulu waKwaZulu-Natal uMnuz Thami Ntuli, uncome umsebenzi wamaphoyisa ngokuboshwa kukaNgubane.
Uthe uNgubane kuthiwa uye enyangeni eyofuna usizo ngamacala akhe, inyanga yawusola umgqakazo yahlaba umkhosi emaphoyiseni.
UNtuli uveze nokuthi akasayi namhlanje esiteshini samaphoyisa eMariannhill ukuyovula icala umfowabo kaNgubane, okusolwa ukuthi usesabisa ofakazi.
Ihhovisi likaNtuli izolo beliveze ukuthi yena noKhomishana wamaPhoyisa esifundazweni, uLieutenant-General Nhlanhla Mkhwanazi bazoya esiteshini samaphoyisa iMariannhill namuhla.
Kuthiwa bayofuna izimpendulo zokuthi weqe kanjani uNgubane owaqala wabanjwa ebhace eTshelimnyanga, eMariannhill, ebalekela amacala 'okudlwengula' eBizimali.
Usolwa ngamacala ayisithupha okudlwengula izingane zalesi sikole ezihlala emakotishi, emizini eseduzane.
Kuthiwa weqa emuva kokuziqulekisa, ethi uhlaselwa yisifo sofuba, kwathi uma amaphoyisa ezama ukumsiza kulokho, waphunyuka, wabaleka.
UNtuli uthe noma yiluphi uhlobo lokusatshiswa kofakazi luyicala elibucayi futhi ngeke lubekezelelwe.
“Sifuna ukukubeka kucace ukuthi ukusatshiswa kofakazi kuwukuma endleleni yobulungiswa, kanti ngeke sinanaze ukuvikela abazophumela obala ngalokhu,” kusho uNtuli.
Mayelana nokuhambela kwakhe esiteshini samaphoyisa iMariannhill, uNtuli uthe bahlose ukuthi bacaciseleke ngokweqa kukamsolwa, baphinde baqinisekise ukuthi lowo okufanele aphendule ngalokhu, wenza njalo.
Okhulumela amaphoyisa KwaZulu-Natal, uColonel Robert Netshiunda, ukuqinisekisile ukuthi amaphoyisa aseMariannhill asephinde ambopha umsolwa oneminyaka engu-28, oweqe esitokisini ngoMsombuluko, kulandela ukuboshwa kwakhe ngezikhathi zasekuseni ngalolu suku.
Uthe amaphoyisa abemthungatha ubusuku nemini, ambhadame ebhace ehostela eliseMbilo (iDalton) izolo.