Ikhwelo lokubuyisela i-ANC emandleni eKZN

KUHLATSHWE ikhwelo lokuthi kubuyiswe isifundazwe iKwaZulu-Natal neTheku ezandleni ze-ANC ukuhlonipha iphini likamengameli wophiko lwabesifazane kuzwelonke, uNkk Lungi Mnganga-Gcabashe.

Lokhu kugqame enkonzweni yesikhumbuzo yalo mholi ebisePlayhouse, eThekwini.

UMengameli walolu phiko, uNksz Sisisi Tolashe, uhlabe ikhwelo lokuthi kubuyiswe iKZN ezandleni ze-ANC.

Lesi sifundazwe siphethwe ngokuhlanganyela nguhulumeni wokubambisana kwamaqembu kuhlanganisa i-IFP, DA, ANC ne-NFP.

"Kumele sisukume singabesifazane ukuze sibuyise ukuphathwa kweKZN. Siyazi uLungi wayelwelani, asibuye isifundazwe," kusho uNksz Tolashe.

NoMnuz Bheki Cele uthe kumele kubuyiswe iTheku, uma selibuyile kubuyiswe neKZN ezandleni ze-ANC.

"Asenzeni lokhu ukuhlonipha uLungi. Yekani ukuhala, ake sisebenze ngamandla sibuyise iTheku, neKZN. Abantu bayayithanda i-ANC, ithina esiqhelile kubantu. Yekani le nto yokubanga izikhundla, izikhundla eze-ANC, akuzona ezikamuntu," kusho uCele.

UNksz Tolashe uxwayise abesifazane ukuthi bangangeni emaphaketheni alabo abafuna ukubathenga.

"Ngeke wakhiwe ngemali, phumani kulabo abafuna ukunithenga ngemali. Kwazini ukuzimela ningathathi imali," usho kanje.

Ukhale ngabanye abakule nhlangano kodwa abafuna ukuya kwamanye amaqembu.

"Siyazi baningi abalindile kwi-ANC, abathatha lonke ulwazi bayonika izitha zethu. Kumele silwe nezinto ezifuze lezi embuthweni."

UCele ukhale ngamadoda amadala asengamakhehla ashiya i-ANC.

"U-ANC ufike akwenzele konke, bese ucabanga ukuthi inhlangano iyakukweleta. Phuma kwi-ANC ukuze uzibone ukuthi awulutho. Thina sijatshulelwa abantu ngoba kune-ANC emhlane," kusho uCele.

UNkk Mnganga-Gcabashe uzofihlwa kusasa, kanti inkonzo yakhe izobanjelwa e-ICC, eThekwini.