Kuhlukene imibono 'ngokuxhaswa' kwama-Metro FM Awards ngo-R25 million

KUHLUKENE imibono ngokuxhaswa komcimbi wezindondo, amaMetro FM Music Awards, wuMasipala weTheku. Lo masipala umemezele ukuthi ungene esivumelwaneni nabahleli bamaMetro Awards, seminyaka emithathu esizowudla u-R25 million.

"UMasipala usuzibophezele esivumelwaneni sokusingatha umcimbi odumile amaMetro FM Music Awards ozofaka kuwo imali engu-R25 million eminyakeni yemali emithathu ezayo," kusho umasipala esitatimendini oveze ukuthi lesi siphakamiso senziwe emhlanganweni oyisipesheli wesigungu obungoLwesihlanu.

Sithe kulo mhlangano kuthathwe izinqumo ezizosiza ukuphuthumisa ukuhlinzekwa kwezidingo emphakathini.

Siqhube sathi izinqumo ezithathiwe, zisazodluliselwa esigungwini sawo wonke amakhansela. Umkhandlu uthe lesi sivumelwano sizosiza ukubeka iTheku ebalazweni nokuheha abavakashi Kuvezwe nokuthi kuzodaleka amathuba omsebenzi kuphinde kwenze iTheku laziwe nasemazweni angaphandle.

UMnuz Zwakele Mncwango ohola i-Action SA ethintwa, uthe kuyamethusa ukukhishwa kwalesi simemezelo ekubeni umkhandlu ophelele weTheku ungakaziswa.

"Ubani osayine lesi sivumelwano isigungu esiphelele singakabikelwa, izothathwa kusiphi isabelomali le mali okuzoxhaswa ngayo lo mcimbi?" kubuza uMncwango.

Uthe lokhu kukhombisa ukuthi umkhandlu ophelele ubukelwa phansi uma kuzothathwa izinqumo ngaphandle kwawo. Uqhube wathi iTheku linenkinga yengqalasizinda exosha izivakashi nendle egelezela olwandle.

"Uma ungakulungisile konke lokhu ulindele ukuthi ubani ozovakashela eThekwini? Siyayidinga imicimbi ezofukula umnotho wedolobha kodwa kuya ngokuthi kusetshenziswa imali engakanani," kusho uMncwango.

Uthe le mali ngabe itshalwa ezintweni ezizosiza izakhamuzi njengohlelo lwamabhasi iGo Durban obeluzohlanganisa izindawo ezingaphansi kweTheku.

Okhulumela i-DA kwezokuThuthukiswa koMnotho eThekwini, uNksz Welekazi Sibiya, uthe bayakwamukela ukubuya kwamaMetro FM Awards eThekwini. Kodwa, uthe bazovula amehlo ngoba imicimbi efana nalena ayiphathwanga ngendlela phambilini.

"I-DA izobamba iqhaza elikhulu ukulandelela ukuqinisekisa ukuthi izakhamuzi ziyahlomula njengoba kuthembisa abahleli bomcimbi," kusho uNksz Sibiya.

I-EFF eThekwini ngomlomo kaMnuz Themba Mvubu, ithe uma lesi sivumelwano sizozuzisa izakhamuzi bazoseseka.

Umbuzo okhona owokuthi yini ezozuzwa abantu esibamele kulokhu, uma impendulo ithi kukhona asinaso isizathu sokuphikisa, " kusho uMvubu.

Uthe banomthwalo wokuvusa iTheku ngakho imicimbi ezokwenza lokhu ngeke bayiphikisa. "Kufanele siwuqede umqondo wokuthi izindawo eziphethwe abantu abamnyama aziphumeleli yingakho singeke sakuphikisa okuzoyisa iTheku phambili, inqobo uma kuzozuza umphakathi," kusho uMvubu.

Umasipala uphinde waveza ukuthi  uzothengela uphiko lwawo lwamanzi nokuthuthwa kwendle  izimoto, ogandaganda namaloli athwala amanzi ngo-R784. 8 million.

"Lokhu kuzobhekana nenkinga yengqalasizinda esigugile, isidingo samanzi esiphezulu nokuphazanyiswa kokuhlinzekwa kwezidingo, ikakhulukazi ezindaweni ezakhahlanyezwa yizikhukhula neziyimijondolo," kusho iTheku.

Umasipala uthe ukunciphisa ukuthembela emalolini amanzi aqashiwe kuzokwehlisa izindleko.  Uveze ukuthi unamaloli amanzi angu-299, okubalwa asanda kuthengwa asebenza ezindaweni eziseThekwini.

"Kodwa, lezi zimoto azanele ukuhlangabezana nokwanda kwabantu nemijondolo engenayo ingqalasizinda yamanzi."