Uzochazela iPhalamende ngokushintshwa komthetho 'ukuhlomulisa' eka-Elon Musk

UNGQONGQOSHE wezokuXhumana uMnuz Solly Malatsi uqinisekise ukuthi uzosihlonipha isimemo sekomiti lezokuxhumana ePhalamende, elifuna azochaza ngomyalelo oshicilelwe okuthiwa uvuna inkampani ye-internet, iStarlink.

NgoLwesihlanu uMalatsi ukhiphe umyalelo obukeka uxegisela inkampani yempunyela uMnuz Elon Musk iStarlink, ukuthi ingene kuleli. Phambilini obekuvimbile bekuthiwa yimithetho yokuthi izinkampani zaphesheya kumele zibambisane nezosomabhizinisi bakuleli uma zifuna ukuzoqala ukusebenza ngokweBroad-Based Black Economic Empowerment (B-BBEE).

USihlalo wekomiti lezokuxhumana ePhalamende, uNkk Khusela Diko esitatimendeni ngempelasonto, uthe bameme uMalatsi ukuthi azochaza ngesenzo sakhe athe sibukeka singahambisani ne-Electronics Communications Act.

“USection 9 (2) (b) we-Electronics Communications Act (ECA) 36 ka-2005 ubeka imigomo ngesicelo nemvume yelayisensi emkhakheni wezokuxhumana futhi uyalela i-Icasa (Independent Communication Authority of South Africa), ukuthi ibhekele ukuthi ababencishwe amathuba phambilini bathola ingxenye engekho ngaphansi kuka-30%,” kusho uNkk Diko.

Uthe umhlangano uzoba sePhalamende ngoLwesibili ngo-9 ekuseni.

UMalatsi ubhale ku-X ukuthi uzosihlonipha isimemo.

IStarlink wubuchwepheshe be-internet okuthiwa busebenza ngisho emakhaya lapho oyithengayo ethola okubekwa ngaphandle kubheke emkhathini kudonse i-network ne-router bese ekhokha ngenyanga ukuthola i-internet.