Ayikaziwa imbangela yomlilo engqongqise imijondolo
Sinje isimo emijondolo engqongqe ngeSonto ebusuku Effingham eThekwini
Image: Sithunyelwe
USHE wangqongqa nomjondolo owesilisa wasePort St Johns, e-Eastern Cape ngesikhathi kuqubuka umlilo ngeSonto ebusuku e-Effingham, eThekwini.
UMnuz Ayanda Ziqethu (29), ushe ngesikhathi kokheleka umlilo emijondolo engu-22 eshe yaba ngumlotha.
UMphathiswa wezokuThutha nokuHlaliswa kwaBantu KwaZulu-Natal, uMnuz Siboniso Duma udlulise amazwi endunduzo emndenini kamufi, oshe wangabonakala.
Uthe uthumele ithimba ehhovisi lakhe elizohlangana nomndeni kamufi ukuze lidlulise amazwi endunduzo.
"Ngixhumane noKhomishana wamaphoyisa uGeneral Nhlanhla Mkhwanazi ukuze ithimba lakhe liyolanda izinsalela zikamufi endaweni yesigameko. Ngixhumane noNgqongqoshe kazwelonke wezokuHlaliswa kwaBantu uNksz Thembi Simelane, neMeya yeTheku uMnuz Cyril Xaba, ukuze singenelele ngokushesha sisize umphakathi osele dengwane," kusho uDuma.
Uthe uzovakashela leya ndawo maduzane.
"Okwamanje asiyazi imbangela yomlilo, sizolinda umbiko ovela kumasipala. Ngokombiko esinawo ingu-22 imijondolo eshile, okukhahlameza kwashiya dengwane abantu ababalelwa ku-21 kuya ku-28," usho kanje.
Uthe uma sebethole lonke ulwazi bazobe sebekwazi ukusheshisa izinhlelo zokungenelela basize abasele endle.
"Sifuna abakhahlamezekile bakwazi ukusheshe balungise izinto. Sibonga nethimba lezinhlekelele elisebenze ngamandla langenelela esimeni esifuze lesi."
Abakhahlamezekile bazosizwa ngezinto ezifana nokudla, izinto zokwakha kanjalo nezinye izinto.