Ubumaye umgibeli edubula umshayeli wetekisi inabagibeli
KUBE ubumayemaye kuphaphalaza itekisi iphuma emzileni izolo, emgwaqweni u-R617 ngaphandle kwaseMerrivale, eHowick, kulandela ukudutshulwa komshayeli wetekisi ithwele abagibeli.
Image: Midlands EMS
KUBE ubumayemaye kuphaphalaza itekisi iphuma emzileni izolo, emgwaqweni u-R617 ngaphandle kwaseMerrivale, eHowick, kulandela ukudutshulwa komshayeli wetekisi ithwele abagibeli.
Le tekisi yaKwaHhaza, kuthiwa ibingaseMpophomeni ngesikhathi omunye wabagibeli, edonsa isibhamu edubula umshayeli, itekisi ihamba.
Ngokusho kwabezimo eziphuthumayo, iMidlands EMS, ifike endaweni yesehlakalo abagibeli belimele.
Bathe umshayeli wetekisi udutshulwe itekisi ihamba, yase iphaphalaza iphuma emgwaqweni.
"Abagibeli abebelimele bathole ukwelashwa endaweni yesehlakalo. Okubuhlungu ukuthi umshayeli wetekisi ushonele endaweni yesehlakalo."
Bathe amaphoyisa bayasiphenya lesi sehlakalo.
Imibiko iveza ukuthi umgibeli odubule umshayeli, wehla etekisini emuva kwalesi sehlakalo wahamba.
Kushaye esokushicilela amaphoyisa engakaphawuli ngalesi sehlakalo.