Kuvela okuningi ngesikhulu se-Sassa esimisiwe

SIHLATSHISWE ikhefu emsebenzini isikhulu esiphezulu esikhungweni esiholela izimpesheni kuleli, i-South African Social Security Agency (Sassa), ukuze kuphenywe indlela esaqashwa ngayo kulesi sikundla.

UNgqongqoshe wezokuThuthukiswa koMphakathi, uNksz Nokuzola Tolashe umhlabise ikhefu emsebenzini uNkk Busisiwe Memela-Khambula.

Isikhulu esimisiwe sizoqhubeka siwuthole uphelele umholo waso ngesikhathi sisekhefwini. Kuvele ukuthi isikhulu sizomiswa kuze kuphothulwe uphenyo oluqhubekayo mayelana nokuqashwa kwaso.

Izintambo zizobanjwa nguMnuz Themba Matlou, ongumphathi we-Sassa eGauteng, kuze kube luyaphothulwa uphenyo.

Esitatimendeni esithunyelwe abezindaba ngoLwesithathu, ungqongqoshe uthe uMvikeli woMphakathi uveze izinto eziningi athe kazihambi kahle ka-Sassa.

Uthe yikhona okumenze wasukuma wathatha isinqumo sokumisa uNkk Memela-Khambula.

“Ngimumise emsebenzini ukuze kungabi khona izithiyo noma ukuphazamiseka ophenyweni oluzobe lwenziwa. Ukumiswa kwakhe emsebenzini kumqoka ukuze kuvikelwe isithunzi se-Sassa,” kusho ungqongqoshe.

Uphinde wancoma intobeko ekhonjiswe yisikhulu esimisiwe emsebenzini ngesikhathi sethulelwa izindaba zokuthi siyamiswa.

Umnyango uthe isinqumo sikanqongqoshe sithathwe ukuze i-Sassa iqhubeke isebenze kahle futhi sibhekelela izidingo zezigidi zabantu abaphila ngemali yesibonelelo sikahulumeni.

“Ngesikhathi sisabhekene nezingqinamba ezikhungethe i-Sassa, sifuna ukuthatha izinqumo ezizoqinisekisa ukuthi ukusebenza kwethu kuvulelekile futhi kuba yimpumelelo,” kuchaza ungqongqoshe.

Uvale ngokuthi i-Sassa iyisikhungo sikahulumeni aqinisekisa ngaso ukuthi abantu ababulawa indlala nobubha.