Kukhuthazwe izintombi ngaphambi koMkhosi woMhlanga

Intatheli YeSolezwe|Published 1 year ago

UMASIPALA waseNkandla uhlanganise izintombi uzozikhuthaza njengoba kulungiselelwa uMkhosi woMhlanga KwaNongoma isithombe: SITHUNYELWE

Aseqalile amalungiselelo andulela umcimbi omkhulu wezintombi uMkhosi woMhlanga oba KwaNongoma minyaka yonke ngoSepthemba.

UMasipala waseNkandla kule mpelasonto uhlanganise izintombi nto ezivela emawadini angu-14 wazenzela umcimbi wokundlalela i-Operation Siyaya eMhlangeni.

AMANYE amatshitshi abesemcimbini i-Operation Siyaya Emhlangeni eNkandla Isithombe: SITHUNYELWE

Kusukela ngoLwesihlanu zikhempe eNkandla Indoor Sports Centre zihuba amahubo, zibhikla ingoma zikhunjuzwa nangokubaluleka kokugcina ubuntombi bazo.

Kuze kwasa zihlangene zigadwe khona omama abahlolayo abaziwa ngonomehlo. NgoMgqibelo zivuke zahlolwa zase zingena umgwaqo ziviliyela zihlobile ziphethe nezinqwebe ezinemiyalezo eyahlukene ekhuza nangodlame lobulili oludla lubi kuleli.

UMNUZ Skhumbuzo Dlamini obambe njengeMeya yaseKing Cetchwayo nePhini leMeya yaseNkandla uNkk Nonhlanhla Nzuza Isithombe: SITHUNYELWE

Zibe sezifikela eNkandla Multipurpose Centre sezihlangatshezwa ondlunkulu bamakhosi ahlukene, imeya ebambile eKing Cetshwayo uMnuz Skhumbuzo Dlamini, iphini leMeya eNkandla uNkk Nonhlanhla Nzuza. Kwabebehambele umcimbi kubalwa uNkk Thobeka Mabhida Zuma namakhansela omkhandlu.