Kudutshulwe umshayeli wePolo ngoyaba lwezinhlamvu
Isale imbobombobo kanje iVW Polo yowesilisa ohlaselwe ngoyaba lwezinhlamvu Isithombe: Reaction Unit South Africa
Kusinde ngokulambisa umshayeli weVW Polo odutshulwe ngoyaba lwezinhlamvu eVerulam, eThekwini, ngoLwesihlanu ntambama.
Lesi sigameko kuthiwa senzeke emgwaqweni uWick Street.
NgokweReaction Unit South Africa (Rusa), le nkampani ithole inqwaba yezingcingo kosomabhizinisi nabahamba ngezinyawo bekhala ngokuduma kwezulu lezandla.
“Onogada bathunyelwe ngabo-6.14 ntambama nokuthe uma befika bathola indoda ihleli esihlalweni somshayeli kwiVW Polo e-silver. Ubetshulwe amahlandla amaningi kwesingenhla emzimbeni nasekubusweni. Unogada udubuleke ethangeni yinhlamvu ebindiza emoyeni,” kusho iRusa esitatimendeni.
Isitatimende sithe abezimo eziphuthumayo bakwaRusa nakwaKZN VIP basize laba ababili ngaphambi kokubaphuthumisa esibhedlela.
Sithe kutholakale inqwaba yamagobolondo esibhamu i-9mm nawesibhamu esikhulu endaweni yesigameko. Bekukhona neVW Polo emhlophe ebishiywe ngaphambi kwemoto yowesilisa olimale kanzima. Iwindi lePolo emhlophe nalo belidubulekile.
“Akukaqinisekiswa ukuthi imoto ishiywe ngabasolwa yini. Imbangela yokuhlasela ayikaziwa.”