Uboshiwe obonakala kwivideo eshaya isalukazi
Uboshiwe umsolwa ona-19 obonakala kwivideo eshaya ugogo wakhe ngezimpama Isithombe: Twitter
USEKHALELWE amasongo kaSigonyela owesilisa oneminyaka engu-19 obonakala kwivideo eshaya ngezimpama ugogo wakhe azawe phansi.
Le video, ezungeza ezinkundleni zokuxhumana, ivuse umunyu, usizi nolaka kubantu.
Okhulumela amaphoyisa kuzwelonke, uBrigadier Athlenda Mathe, uqinisekise ukuthi amaphoyisa aseWestern Cape abophe umsolwa.
UBrig Mathe uthe umsolwa uthungathwe watholwa eWallecedene, eKraaifontein, ngoLwesithathu ebusuku.
Uthe kulindeleke avele eNkantolo yeMantshi eBlue Downs ngecala lokushaya.
Kunezithombe ezingaqinisekisiwe eziveza le ndoda ihlezi phansi iqimbile kwesingenhla imabokobo igxiza negazi.
Kunemibhalo ethi umsolwa utholwe umphakathi wambeka isandla ngaphambi kokuthi kufike amaphoyisa ambopha.
Kule video umgilwa nomsolwa basekhishini akucaci kahle ukuthi bakhuluma ngani.
Umgilwa uphethe ibhodwe okuthi uma sebemshaye ngezimpama ezimbili zilandelana, ngesikhahe esewa phansi alidedele kuchitheke uphuthu oluphakathi kulona.
Umgilwa ubuza ephindelela kumsolwa athi: “Luvo, undibulalela ntoni?” aphendule athi: “ndizokubulala”.