Kuqalwe uphenyo ngengozi ebulale 10
KUFE 10 engozini eyenzeke eMpumalanga, ngoMsombuluko ekuseni Isithombe: Sithunyelwe
I-ROAD Traffic Management Corporation (RTMC) isiqale uphenyo ngengozi okufe kuyo abantu abangu-10 kwalimala kanzima abangu-24 ngoMsombuluko ekuseni, ngaseDelmas, eMpumalanga.
Le ngozi okuthiwa yenzeke ezimpambanweni zomgwaqo u-N12 no-R24, kuthiwa yenzeke ngesikhathi iloli elincane lishayisana eceleni netekisi ngesikhathi iphuma ku-N12 ingena ku-R24.
Itekisi kuthiwa ibinezinombolo zaseMozambique, ithwele abantu bakuleliya zwe abebebheke ngaseMalahleni. Iloli lona kuthiwa beliya ngaseBronkhorstspruit.
Etekisini kufe abayisishiyagalombili okubalwa nomshayeli kwathi abayisithupha balimala kanzima.
Ababili abebeselolini bafile kwathi abantu-18 okuhlanganisa nomshayeli balimala kanzima.
I-RTMC idlulise amazwi enduduzo eminindenini yabashonile yafisela abasesibhedlela ukululama.
Ithe uphenyo luzozama ukuthola ngembangela yengozi kubhekwa indlela abashayeli abenze ngayo, imvelo nokuthi izimoto bezisesimweni zokuba semgwaqweni.