Ubengaphandle ngebheyili osolwa ngokubulala ingane kudunwa imoto
IZIBHAMU ezitholwe kubasolwa ababili ababoshelwe icala lokubulala ingane (5) kudunwa imoto eSoshanguve Isithombe: SAPS
UPHIKO loKlebe lusebenze ngokuzikhandla ngoMsombuluko, lulandela umkhondo wabasolwa kwelokubulawa kukaDitebogo Phalane.
Ngokombiko otholwe yithimba eliphenya icala, umkhondo abawutholile ubaholele eSoshanguve, nase-Atteridgeville. Lapha ithimba libambe abasolwa ababili abaneminyaka engu-29, no-30 ubudala. Kuthiwa batholakale nezibhamu ezimbili okusolakala ukuthi esisodwa sasetshenziswa ngenkathi kubulawa uDitebogo, obeneminyaka emihlanu ubudala.
Lezi zibhamu zizohlohlwa ngochwepheshe ukuze kucace uma zike zasetshenziswa kwamanye amacala. Uphenyo lokuqala mayelana nabasolwa luveza ukuthi omunye wabo ungaphandle ngebheyili yamacala okuduna, ukuzama ukubulala nokutholakala nesibhamu esingekho emthethweni. NgoLwesithathu, kulindeleke ukuba babingelele iMantshi ePitoli.