UNgqongqoshe wamaPhoyisa uzovula ngokusemthethweni iziteshi zamaphoyisa

UNQGONGQOSHE wamaPhoyisa eNingizimu Afrika, uGeneral Bheki Cele uzovula ngokusemthethweni iziteshi zamaphoyisa ezine KwaZulu-Natal.

Lokhu kuvezwe wokhulumela amaphoyisa KwaZulu-Natal, uColonel Robert Netshiunda.

Ekuvulweni kweziteshi ngokusemthethweni, uCele uzobe ephelezelwa wuMkhuzi wamaPhoyisa kuZwelonke, uGeneral Fannie Masemola noMkhuzi wamaPhoyisa KwaZulu-Natal, uLieutenant General Nhlanhla Mkhwanazi.

Isiteshi sokuqala esizovulwa ngokusemthethweni yiGamalakhe Police Station esingaphansi kwesiFunda Ugu, ngoMsombuluko ngo-11 ekuseni.

Esesibili yiDonnybrook Police Station esingaphansi kwesiFunda iHarry Gwala. Sona sizovulwa ngokusemthethweni ngoLwesibili mhlaka 23 Ephreli ngo-11 ekuseni.

Esesithathu yiMelmoth Police Station okuhlelwe ukuthi sivulwe ngokusemthethweni ngo-Ephreli 30. Esokugcina yiManguzi Police Station okuhlelwe ukuthi sivulwe ngokusemthethweni ngoMeyi 3.

Kwenzeka lokhu nje uColonel Netshiunda uveze ukuthi ithimba lokuqala lamaphoyisa angu-10 000 aqashiwe lizo aqala ukuqeqeshwa ezikhungweni ezahlukene zokuqeqesha amaphoyisa.

Uthe ithimba lokuqala lamaphoyisa azoqala ukuqeqeshwa ngoMsombuluko mhlaka 22 Ephreli linabantu abangu-4500.

Elesibili linamalungu angu-5 500, lona lizoqala ukuqeqeshwa ngoJanuwari wonyaka ozayo.

Ukuqashwa kwalama phoyisa kungena ngaphansi konyaka wezimali u-2024/2025.

Ekuphothuleni kwawo ukuqeqeshwa, uthe azofakwa eziteshini ezibhekene nezinga eliphezulu lobugebengu, nasekuqinisekiseni ukuziphatha kahle kwabantu emphakathini.

Amaphoyisa angu-10 000 aqashiwe athathwe kuzona zonke izifundazwe.

Lokhu kuza emva kokuthi uMengameli weZwe uCyril Ramaphosa eminyakeni emithathu eyedlule enxuse ukuthi kwandiswe isibalo samaphoyisa ukuqeda ubugebengu.