Bawu-36 abalimele emabhasini e-IFP
AMABHASI amathathu abandakanyeke engozini kwalimala abalandeli be-IFP abebebheke eMoses Mabhida isithombe: IPSS Medical Rescue/IPSS
KUBE muncu ekuseni ngeSonto, abalandeli beNkatha Freedom Party bethola ingozi belibangise emcimbini waleli qembu enkundleni iMoses Mabhida eThekwini.
Ngokombiko othunyelwe yinkampani yezimo eziphuthumayo, i-IPSS Medical Rescue, baphuthume kuN2 phakathi kweGingindlovu neMandeni, bethola umbiko ngengozi yamabhasi amathathu.
Kuthiwa bawu-36 abantu abalimele kule ngozi, kodwa bayisishiyagalombili abaphuthunyiswe esibhedlela, kubo uyedwa osesimeni esibucayi.
Ayikho imibiko yabashonile kanti nembangela yokushayisana kwalawa mabhasi kayaziwa.
Kuthiwa abeRural Metro Fire Department yibona abalekelele ukutakula abantu abebevaleleke emabhasini ukuze bakwazi ukuthola usizo lokuqala.
