I-Action SA ifuna kuphenywe i-ANC
Isikhonzi senkantolo ngesikhathi siyodla impahla ekomkhulu le-ANC eLuthuli House ukuze kukhokhwe isikweletu se-Ezulweni Investments Isithombe: Itumeleng English/Independent Media
Iqembu lezepoliti, i-Action SA, lifuna kuphenywe ukuthi i-ANC iwukhokhe kanjani u-R102 million ebiwukweleta inkampani i-Ezulweni Investments.
I-Ezulweni yathi ikweletwa le mali ngomsebenzi wokugaya izingqwembe zokukhankasela ukhetho lukazwelonke lwango-2019.
INkantolo yokuDluliswa kwamaCala yanikeza le nkampani yezokuxhumana yaKwaZulu-Natal igunya lokudla impahla ye-ANC ukuze ithole imali eyikweletwayo.
NgoMsombuluko i-Ezulweni ikhiphe isitatimende iqinisekisa ukuthi ibe nesivumelwano ne-ANC ngaphandle kokuya enkantolo. Ibonge uMgcinimafa we-ANC kuzwelonke uDkt Gwen Ramokgopa ngokuzibophezela ekuxazululeni lolu daba.
I-Action SA ngoLwesibili ibhalele isikhulu esengamele ukuxhaswa kwamaqembu i-Electoral Commission of South Africa (IEC), uMnuz George Mahlangu ifuna siphenye ngokwesigaba-14 somthetho iParty Funding Act.
"NgoDisemba 22, nyakenye, i-ANC ikhiphe isitatimende esiyimisho emibili ithi yenze isivumelwano esivuna izinhlangothi zombili. Ayikho imininingwane evelile ngalesi sivumelwano."
I-Action SA ithe ifuna ukwazi ukuthi isikweletu sikhokhwe kanjani nokuthi sikhokhwe ngesivumelwano esisemthethweni yini.
"Kubalulekile nokuqonda ukuthi ngobani abanikelile nokuthi laba noma i-Ezulweni Investments izozuza yini ngokwenza umsebenzi nohulumeni ngomuso."
Ithe encwadini yayo iveze ukungenami kwayo ngokukhetha ukulandelwa kwalo mthetho.