Siyanda isibalo samaqembu ahlela ukuketula i-ANC
South Africa Johannesburg IEC voters register- 24 October 2023. The first of two voter registrations is set for 18 and 19 November 2023. Voting in the provincial and national elections is being discussed with president Cyril Ramaphosa IEC CEO Sy Mamabolo says. IEC chairperson Mosotho Moepya speaks about the readiness to take on the task for registration. Several political parties are present to monitor the event and support this organization. Picture: Timothy Bernard / African News Agency (ANA)
SIYENYUKA isibalo samaqembu ahlangana ngenhloso yokuketula i-ANC emandleni, okhethweni olubhekwe ngabomvu lukazwelonke lwangoyaka ozayo.
Lokhu kulandela ukungena kwamaqembu i-Ekhethu People’s Party, ezinze eGauteng ne-United Christian Democratic Party, eyasungulwa ngowayengumholi waseBophuthatswana, uMnuz Lucas Mangope.
Leli qembu lizinze eNorth West kanti womabili azoba yingxenye yokhetho ukuze ancozule amavoti kaKhongolose.
Isitatimende senhlanganisela yamaqembu abambisene okuyi-DA, IFP, FF Plus, ActionSA, ACDP, ISANCO, UIM neSNP, samukele lawa maqembu kule nhlanganisela.
Sithe sinethemba lokuthi lawa maqembu azodla amavoti e-ANC kulezi zindawo.
“Sifuna ukunika abavoti into ehlukile kunalokho abakunikwa i-ANC. Sinxenxa abantu bakuleli ukuthi basondele bavotele inqola ehambayo.”
Le nhlanganisela ithembisa ukuthi kuzoba nokulingana ngakwezomthetho, amandla azobuyela kohulumeni basekhaya, kuzoliwa nenkohlakalo, kuzolethelwa abantu izidingo ezibafanele.
“Kuzohlinzekwa ngemfundo nezempilo ezisezingeni, kukhuliswe nomnotho ontengayo. Sizosebenza ngamandla ukubumba abantu bakuleli ukuze kube nezinguquko kuleli.”
Kwenzeka lokhu nje, uMengameli we-ANC uMnuz Cyril Ramaphosa, usephufumule ezinkundleni ezehlukene ngokuthi le nhlanganisela yamaqembu ngeke iyiketule le nhlangano.
URamaphosa wathi bayazi ukuthi ikuphi okudingwa ngumphakathi ngakho bayazilungisa izikhalazo zawo.
Waveza ukuthi abeseka i-ANC abawavoteli amanye amaqembu uma bengeneme kodwa bamane bajezise le nhlangano ngokuthi bangayi kovota, bazihlalele emakhaya.
Namhlanje abaholi be-ANC okubalwa noRamaphosa basonga imihlangano abebeyihambele yokuchazela abantu ngabakwenzile selokhu bathula umqulu wezethembiso zokhetho lwango-2019.
Lo mhlangano usongwa e-Alberton Civic Centre Ekurhuleni, eGauteng.