Izigwebo ezehlukene kwabangamalungu ePhalamende

KUSHIYANE izigwebo kuhlawuliswa amalungu ePhalamende amathathu alahlwe amacala ahlukene.

Elinye lalamalungu lizomiswa, elinye lizobanjelwa umholo, kanti elesithathu liyalelwe ukuba lixolise.

Amalungu agwetshwe izolo uNgqongqoshe wamaPhoyisa, uMnuz Bheki Cele, iphini likamengameli kwi-EFF, uMnuz Floyd Shivambu, nowayenguNgqongqoshe woMnyango wezokuThutha, uNkk Dipuo Peters.

UCele ulahlwe icala lokuthethisa ilungu lomphakathi ngesikhathi kunomhlangano womphakathi.

UShivambu ulahlwe icala lokwahluleka ukudalula imali ayithola enkampanini okusolwa ukuthi yahlomula emalini yebhange laseLimpopo, iVBS.

UNkk Peters ulahlwe amacala okwehluleka ukuphatha ngendlela ngesikhathi engungqongqoshe.

Ikomiti elibhekele ukuziphatha kwamalungu ePhalamende lezwa ukuthi ukuziphatha budedengu kukaNkk Peters kwaholela ekutheni umnyango ulahlekelwe izigidi zamaRandi.

UNkk Peters kuthiwa wehluleka ukuqasha ngesikhathi isikhulu esiphezulu kwiPrasa, bekuphinde kube nezinsolo zokuthi wagunyaza ukuthi amabhasi akwaPrasa athuthe amalungu e-ANC.

Izolo iPhalamende linqume ukuthi uNkk Peters amiswe.

USomlomo wePhalamende, uNkk Nosiviwe Mapisa-Nqakula, uthe uNkk Peters uzomiswa kuyo yonke imihlangano yasePhalamende neyamakomiti asePhalamende.

“Uzomiswa kuze kube kuphela isigaba esisodwa sokuhlala kwemihlangano yePhalamende.”

UNkk Mapisa-Nqakula uthe uShivambu uzobanjelwa umholo wezinsuku eziyisishiyagalolunye.

UShivambu ubebhekene necala lokuthi wahluleka ukudalula uR180 000 awuthola enkampanini iSgameka Pty Ltd.

Le nkampani ekamfowabo kaShivambu, uMnuz Brian Shivambu.

ISgameka kuthiwa yathola izigidi zamaRandi kwiVBS.

I-EFF iphikisene nalo mbiko, kepha iningi lamalungu ePhalamende lavotela ukuba uShivambu ashaywe ngalesi sigwebo.

UNkk Mapisa-Nqakula uthe uCele uyalelwe ukuba axolise ePhalamende.

UCele wahilizisana noMnuz Ian Cameron embizweni yamaphoyisa eyayiseGugulethu ngonyaka odlule.

UCele owayesecasukile wamemeza etshela uCameron ukuthi angamchukuluzi, akavale umlomo ahlale phansi noma aphume ahambe lapho kwakuhlanganyelwe khona.

Phambilini uCele wake waveza ukuthi uzosiphonsela inselelo isigwebo sakhe ngesikhathi elahlwa icala.

Ubengekho ePhalamende izolo ngesikhathi enikezwa isigwebo.