Bekuqhilika izihlathi bewina kowamaBhokobhoko
UTHISHANHLOKO waseSibonelo High, KwaMashu, uMnuz Sthembiso Ntuli nabafundi bakulesi sikole bejabula ngemuva kokuhlabana emncintiswaneni wezikole wokuqamba iculo lokukhuthaza amaBhokobhoko, obuhlelwa abakwaMTN, iGwijo Challenge, izolo Isithombe: TUMI PAKKIES: INDEPENDENT MEDIA
BEKUQHILIKA izihlathi kubafundi baseSibonelo High KwaMashu abalale isithathu emncintiswaneni wezikole ebeziziqopha ama-video zicula amaculo eseka amaBhokobhoko.
Kulo mncintiswano obuhlelwe ngabakwaMTN, izikole zakuleli beziqopha ama-video zicula amaculo okweseka amaBhokobhoko ngesikhathi kunemidlalo yeNdebe yoMhlaba ye-rugby, iGwijo Challenge.
Lesi sikole siphume isithathu ezikoleni ezingaphazulu kuka-140 ebezingenele umncintiswano.
Izolo abakwaMTN bebelethe isheke lika-R200 000 eliyingxenye yemali engu-R1 million, izikole eziwinile ezizohlukaniselana ngawo.
Abafundi ababili abafunda izifundo zeDrama kulesi sikole u-Ayanda Cele ofunda uGrade 10 noSanele Maphumulo ofunda uGrade11, okuyibona abaqhamuke nombono wokuthi isikole sabo siwungenele umncintiswano, bathi inhloso enkulu yokuthi bafune isikole singenele umncintiswano bekuwukugqamisa isikole sabo ngoba ama-video abefakwa ezinkundleni zokuxhumana.
Uthisha wabo obebasiza ngokuqamba iculo, uNksz Nomfundo Mbhele, uthe leli culo lenziwa ngemizuzu engu-30 lase lifakwa ezinkundleni zokuxhumana.
"Bekungewona umsebenzi olula ngoba abanye abafundi bethu abanawo amaTV namaselula bebengazi nokuthi yini iGwijo Challenge. Bekumele ngingene kwi-internet ngibakhombise amanye ama-video ukuze babone. Ngijabule kakhulu ukuthi ukuzikhandla kwethu kube nomphumela omuhle," kusho uNksz Mbhele.
Uthishanhloko walesi sikole uMnuz Sthembiso Ntuli, uthe: "Bengiqala empilweni yami ukusebenzisa u100GB we-data. Bekumele ngicele abantu abadumile, abanye ababefunda kulesi sikole ukuthi bafake i-video. Iphupho lokuqala lafezeka ngoba ngafonelwa abakwaMTN bethi i-video yethu isigcwele ezinkundleni zokuxhumana."
Uthe imali ewumhlomulo izosetshenziselwa ukulungisa ingqalasizinda yesikole, kodwa kusazohlangana isigungu sokuphathwa kwesikole kuboniswane ukuthi yini engenziwa ngayo .
UNksz Portia Zondi oyiMarkerting Mananger yakwaMTN, eKZN, uthe: “Kusijabulisile nathi ukuthi kube nesikole saKwaZulu-Natal kulezi eziphume phambili,"
