Uzofihla uShenge aphuthume phesheya umengameli
KULINDELEKE ukuthi uMengameli Cyril Ramaphosa athule inkulumo yosuku emfihlweni womsunguli we-IFP uMntwana Mangosuthu Buthelezi
UMENGAMELI Cyril Ramaphosa wuyena ozothula inkulumo yosuku njengoba kuzobe kufihlwa uMntwana waKwaPhindangene, uMangosuthu Buthelezi, ozobekwa endlini yokugcina ngoMgqibelo, oLundi.
Lokhu kuvezwe wuMnuz Vincent Magwenya okhulumela umengameli. “Ngemuva kwenkulumo emngcwabweni kaShenge, uMengameli wezwe uzophuthuma aye, eNew York, emhlanganweni we-United Nations General Assembly,”kuchaza uMagwenya obebika ngohlelo lukaRamaphosa kusukela manje kuya phambili.
Lokhu kusho ukuthi uRamaphosa kungenzeka asheshe akhulume emthunweni njengoba kungathi unemisebenzi eminingi okumele ayenze.
Isolezwe selingakuqinisekisa ukuthi uNgqongqoshe wamaPhoyisa uMnuz Bheki Cele usefikile oLundi. Njengamanje unomhlangano nabaholi beNkatha Freedom Party.