Ukhuza abadelela uShenge kwezokuxhumana
Inkosi Mangosuthu Buthelezi okhothame ngoMgqibelo ezintatha Isithombe: PATRICK MTOLO
UMengameli we-IFP usephumele obala wakhuza labo abadelela amagalelo oMntwana waKwaPhindangene, uMangosuthu Buthelezi, odlule emhlabeni ngoMgqibelo ekuseni.
UMnuz Velenkosini Hlabisa, ekhuluma kwezinye zezinhlelo zethelevishini, esemzini kaShenge eMahlabathini, uthe njengeqembu le-IFP bayayibona eminye yemibhalo engemihle ngomlando kaShenge, edamane ivela ezinkundleni zokuxhumana.
“Siyanxusa kulabo abenza lokhu ukuthi bakuyeke,” kusho uMengameli we-IFP.
Kukhona obhale ezinkundleni zokuxhumana wathi uShenge ubengayena uMntwana kodwa unina owazalwa ebukhosini, hhayi yena.
Bakhona nalabo abagxeka uMntwana waKwaPhindangene neqembu iNkatha ngokufa kwenqwaba yabantu ngesikhathi kunodlame lwezepolitiki ngeminyaka yo-1980 nango-1990 kukapakela nakuma-2000.
Abanye bebemhlanganisa nohulumeni wamabhunu bethi wayesebenzela wona.
Ephawula uMnuz Tony Leon ngoShenge, uthe wayenobuchule bokusebenzisana nohulumeni wezikhathi zobandlululo aphinde akwazi nokuxhumana nabanye babaholi be-ANC njengoba naye eke waba yilungu layo.