AbeNFP bafuna kuphenywe ijaji
AFUNA kuphenywe ijaji elanikeza ubuholi benhlangano amalungu eNFP anganelisekile Isithombe: SIGCINIWE
AMALUNGU eNFP anganelisekile afuna kuphenywe ijaji elanikeza ubuholi bale nhlangano obakhethwa ngo-2019 imvume yokuphonsela inselelo isinqumo senkantolo esabuhlakaza.
Amalungu eNFP anganelisekile asebhalele inhloko yamajaji KwaZulu-Natal, iJaji Thoba Portia Poyo-Dlwati, elicela ukuthi liphenye ukuziphatha kweJaji Sidwell Mngadi.
UMngadi usanda kunikeza ubuholi beNFP obakhethwa engqunqutheleni eyayisoLundi igunya lokudlulisela phambili isinqumo senkantolo eNkulu eMgungundlovu esahlakaza lobu buholi obabuholwa ongasekho, uNkk Zanele Magwaza-Msibi, ongumsunguli weNFP.
Lobu buholi bahlakazwa isinqumo senkantolo eNkulu eMgungundlovu esathola ukuthi yayingekho emthethweni ingqungquthela okwakhethwa kuyo ubuholi.
Amalungu eNFP anganeliskile athe kwakukade kuvunyelwene ngokuthi ukulalelwa kwesicelo sobuholi obahlakazwa kuzohlehliswa, kepha uMngadi wavele waqhubeka nokulalela isicelo waze wakhipha nesinqumo abameli bolunye uhlangothi bengekho enkantolo.
Encwadini ebonwe yiSolezwe, la malungu athe uMngadi wayenolwazi lokuthi kunesivumelwano sokuthi kuzohlehliswa ukulalelwa kwecala.
Ummeli wamalungu eNFP anganelisekile, uMnuz Siyabonga Kunene, uthe bathuka koma nasozwaneni uma sebezwa ukuthi uMngadi walalela isicelo waze wakhipha nesinqumo.
“Abameli bolunye uhlangothi bathi bazokuya ecaleni, bese icala lifike lihlehliswe emva kokuthi sikhale ngokuthi asinikezwanga isikhathi esanele ukuba sizilungiselele. Lo myalezo wathunyelwa nakumabhalane wejaji. Kuyamangaza ke ukuthi leli jaji laqhubeka nokulalela icala laze lanikeza olunye uhlangothi lokudlulisela phambili isinqumo.”
UKunene ufuna kuphenywe nokuziphatha kwabameli bolunye uhlangothi.
Omunye wamalungu eNFP anganelisekile, uMnuz Teddy Thwala, uthe basazophinde bafake nesicelo sokuthi kuhoxiswe isinqumo sikaMngadi.
Ukuhoxiswa kwesinqumo sikaMngadi kungasho ukuthi sisamile isinqumo sokuthi yayingekho emthethweni ingqungquthela eyakhetha ubuholi bango-2019.
Owakhethwa njengonobhala jikelele engqungqutheleni yango-2019, uMnuz Canaan Mdletshe, uthe bebengakezwa ngesikhalo esifakwe amalungu eqembu anganelisekile.
“Angikwazi ukuphawula kakhulu ngoba angikasiboni isikhalo sabo kodwa ngingakusho nje ukuthi kuyishwa ukuthi bathathe leso sinyathelo ngaphandle kokuthi baxoxe nathi kuqala. Asiboni ukuthi kuyisinqumo esiphusile lesi abasithathile ngoba nabo bahlezi beya ezinkantolo, bathole izinqumo abazifunayo. Thina asikaze singakhala ngalokho.”
UMdletshe uthe bazobhunga ngalokhu njengobuholi beqembu emhlanganweni wabo olandelayo.
Ihhovisi likaJaji Poyo-Dlwati likuqinisekisile ukuthi lisitholile lesikhalazo samalungu eNFP anganelisekile, lathi sisacutshungulwa.