Ikomiti elizolwa nokuhlaselwa kwezitshudeni oNgoye

KUSUNGULWE ikomiti elizobhekela izinhlelo zokulwa nokuhlaselwa kwezitshudeni ngabantu ababizwa ngaMadabuka eNyuvesi yasoNgoye.

Izolo Isolezwe libike ngokuhlaselwa kwezitshudeni ngabazibiza ngaMadabuka abebehlomile, okuthiwa bahlasele ngoLwesibili ebusuku, bashaqa impahla yezitshudeni. Kulesi sigameko kuboshwe abasolwa ababili.

NgoLwesithathu ntambama, isikhungo sibize umhlangano nenhlangano yezitshudeni, amakhansela nabo bonke omastende abaqashise izitshudeni zasoNgoye kudingidwa isisombululo ngenkinga ebhekene nezitshudeni.

Emhlanganweni kusungulwe ikomiti elizobhekela zonke izinhlelo ezihlongozwayo, ukuthi zenzeka ngendlela efanele.

Ngokusho kwekhansela lendawo, uMnuz Ntuthuko Makhanya, umhlangano ube yimpumelelo. Zonke izinhlaka ezithintekayo zizibophezele ukufeza okuvunyelwane ngakho emhlanganweni.

“Umhlangano uvumelane ngokuthi, zonke izindawo ezihlala izitshudeni ezingaphandle kwenyuvesi zibe nabaqaphi, abazogada ebusuku nasemini, abazokhokhelwa womastende. Okuhle wukuthi bazivumele bona omastende, ukuthi lokhu bazokwenza ngokuphuthuma.

Sibe sesakha ikomiti elizobhekela zonke izinhlelo, okubalwa nezokuphepha,” kubeka uMakhanya.

Eqhuba, uthe okunye okuhlongoziwe emhlanganweni, wukuvulwa kwesikhwama semali esizolekelela izinhlelo ezisunguliwe, silekelele nokusebenza kwekomiti elisunguliwe.

Ugcizelele ukuthi amalungu azoba sekomitini asafunwa, awakabekwa.

Umholi wenhlangano emele izitshudeni zasoNgoye, iSasco, uSiyamukela Khumalo, uthe emhlanganweni kuvunyelwane ngokuthi izitshudeni ezintshontshelwe, zizokhokhelwa yibo omastende.

“Emhlanganweni kuvunyelwane ngokuthi umastende akhokhele izitshudeni ezintshontshelwe nokuthi, kuqashwe inkampani yonogada ezosebenza ubusuku nemini. Kusungulwe nekomiti elizoqinisekisa ukuthi konke okukhulunywe emhlanganweni kuyenzeka”, kubeka uKhumalo.

Usole uhulumeni ngokulubalekela kulolu daba, ikakhulukazi uNgqongqoshe wamaPhoyisa uMnuz Bheki Cele, owabathembisa ukubakhela isiteshi samaphoyisa esiseduze kwenyuvesi, okumanje asikho.

Umqondisi wezokuxhumana oNgoye, uNkk Gcina Nhleko-Mdluli uthe bavumelane ngokuthi izitshudeni ezithintekile zikhishwe ziyiswe kwenye indawo ephephile. Bonke abathintekile banikezwe nosizo lokululekwa ngengqondo.