Ugcine esulile uZikalala

IYAQONGA eyezinguquko kwiKhabhinethi kaMengameli Cyril Ramaphosa njengoba abanye abaholi be-ANC okubalwa iPhini likaMengameli, uMnuz Paul Mashatile, eseyilungu lePhalamende.

ObenguNgqongqoshe wezokuBusa ngokuBambisana neziNdaba zoMdabu KwaZulu-Natal, uMnuz Sihle Zikalala, usulile njengelungu lesiShayamthetho esifundazweni okuqinisa izinsolo zokuthi uzojutshelwa ePhalamende likazwelonke njengoba eyilungu lesigungu esiphezulu se-ANC.

UMashatile ungene esikhundleni esishiywe yilungu le-ANC uMnuz TB Munyai, oshiye ngoLwesithathu.

Nakuba uMashatile engakafungiswa ngokusemthethweni njengelungu kodwa ukungathameli umhlangano weKhabhinethi Lekgotla osongwa namhlanje kwePhini likaMengameli, uMnuz David Mabuza, kuqinise amahlebezi okuthi uzoyideda inkundla maduzane njengoba uMashatile engasebenzi.

UMabuza akazange awungenele umbango wesikhundla sephini likamengameli engqungqutheleni ebiseNasrec, eGoli, nyakenye.

Okhulumela uSomlomo wesiShayamthetho KwaZuluNatal, uNksz Nomusa Phungula, ukuqinisekisile ukuthi uZikalala usulile njengelungu lesiShayamthetho.

“USomlomo uNksz Nontembeko Boyce uyitholile incwadi yokwesula kwelungu uMnuz Zikalala,” kusho uNksz Phungula.

Ekhuluma neNewzroom Afrika, uZikalala uveze ukuthi usule emuva kokuxoxa noNobhala jikelele, uMnuz Fikile Mbalula nobuholi besifundazwe, ukuthi kumele aye ePhalamende.

Uthe akananxa namuntu futhi akananzondo njengoba asula njengondunankulu wesifundazwe emuva kokuhlulwa kwesikasihlalo we-ANC engqungqutheleni yanyakenye.

Ubalule nokuthi uzoya lapho ethunywa khona futhi akabheke sikhundla sikangqongqoshe njengoba eya ePhalamende.

Kulindeleke ukuthi uRamaphosa enze izinguquko njengoba kunezikhala ezivulekile kwiKhabhinethi.

Esinye sazo esiphethwe nguMbalula njengoNgqongqoshe wezokuThutha okumele asule ukuze ayosebenza ngokugcwele eLuthuli House.

Esinye isikhala esingavaliwe kubalwa esikangqongqoshe weziSebenzi kaHulumeni nokuPhatha.

Kunezinkulumo zokuthi izembe lingahle ligawule nakwabanye ongqongqoshe abangakhethwanga ukuthi babe ngamalungu esigungu esiphezulu sikazwelonke se-ANC noDisemba, okubalwa uNgqongqoshe weziNkampani zikaHulumeni uMnuz Pravin Gordhan, owezabaSebenzi uMnuz Thulas Nxesi, owezobuDlelwano namaZwe oMhlaba uNkk Naledi Pandor, owezeMidlalo ubuCiko namaSiko, uMnuz Nathi Mthethwa nowezeMfundo ePhakeme, iSayensi nezokuQeqesha uDkt Blade Nzimande.