Kumenele owayenguSomlomo wokuqala ePhalamende

SIKHULU isililo ngokudlula emhlabeni kowayenguSomlomo wokuqala ePhalamende lentandoyabantu, uDkt Frene Ginwala.

Ihhovisi likaMengameli limemezele lezi zindaba ngesitatimende ukuthi uGinwala obeseneminyaka engu-90 ushonele kwakhe ngoLwesine ebusuku kulandela ukuhlaselwa yisifo sohlangothi emasontweni amabili edlule.

Ngokwesitatimende, uMengameli Cyril Ramaphos udalule ukuthi uGinwala uzoba nomgcwabo ongekho emehlweni abantu.

Kusona lesi sitatimende esikhishwe izolo, uRamaphosa uzwakalise amazwi akhe enduduzo emndenini wakwaGinwala, kubashana bakhe, uCyrus, Sohrab noZavareh, nemindeni yabo.

Uphinde wadlulisa amazwi enduduzo nakubangani nabesebenza nabo kuleli nasemazweni angaphandle.

UDkt Frene Noshir Ginwala wazalwa ngo-Ephreli 25, 1932 kanti wasebenzisana nezishoshovu ezazilwa nobandlululo ngaphansi kwezigqoko ezihlukene okubalwa esobummeli, isifundiswa, umholi wezepolitiki, isishoshovu nentatheli.

Ngo-2005, wahlonishwa nge-Order of Luthuli in Silver, ngeqhaza lakhe ekulwisaneni nokucindezelwa kwabantu ngokobulili.

"Silahlekelwe ingqalabutho evela esikhathini sabaholi esibakweleta ngezimpilo zethu okuyibona abalwela inkululeko yethu nesibakweleta ukuthi siqhubeke nokwakha iNingizimu Afrika abayilwela ngakho konke ababenakho,’ kusho uRamaphosa esitatimendeni.

Imininingwane egcwele ngenkonzo yesikhumbuzo sikaDkt Ginwala izomenyezelwa maduze.