Kulindeleke imvula enamandla ngempelasonto

KUCEKELEKE phansi imizi komasipala abehlukene esifundazweni i-KwaZulu-Natal, njengoba imvula ilokhu iqhubeka nokuyidliva kwezinye izingxenye zesifundazwe.

Esitatimendeni esikhishwe wuMnyango wezokuBusa ngokuBambisana kulesi sifundazwe, siveze ukuthi imvula ebilokhu iyishaya ngoMsombuluko, kucekeleke phansi imizi ewu-10 emawadini ahlukene ngaphansi kuMasipala waseMngeni, emine endaweni yasoShabeni kuMasipala Ugu neyishumi kuMasipala waseMsunduzi.

Kuthiwa imizi emibili oseNquthu noseMadlangeni, ingenwe umbani. Kuzona zonke lezi zigameko, kuthiwa abekho abashonile. Kubikwe ukugcwala ngokweqile kwamadamu iMidmar neHenley eMgungundlovu, kanti kunxuswa umphakathi owakhele izindawo ezisondelene nawo uqaphele.

Isikhungo esibhekele izinhlekelele esifundazweni sithe simi ngomumo ukuqapha isimo njengoba izangoma zezulu ziveze ukuthi lingase liyidlive ngamandla ngasekupheleni kwaleli sonto.

Ngokombiko wabakwaSouth African Weather Services, amazinga okuna kwemvula azoba ngono kuze kube ikusasa, kanti ngempelasonto ingase iqinise kakhulu.

Ikomiti elihlangene elibhekele ukusebenza kwezikhungo zezinhlekelele komasipala besifundazwe, kuthiwa lizohlangana njalo ukunikeza umbiko okungenani kathathu ngelanga ukuqinisekisa ukuthi kuyangenelwa uma kudingeka, kuze kube imvula Iba ngcono.

“Amathimba ezinhlekelele ayanxuswa ukuthi ahlale eqaphele ukuvika ukuthi kungabikhona abashonayo. Izikhungo ezibhekele izinhlekelele ezifundeni kulindeke ukuthi zithule umbiko ekutheni ingakanani imvula enayo ezindaweni abazibhekele, izigameko ezenzekayo, uxhaso okumele lunikezwe abagilwa namaqhinga angasetshenziswa ukubhekana nesimo,” kubhalwe esitatimendeni.

Kuvele ukuthi lesi sifundazwe singase sibhekane nemvula ethe xaxa, ezinyangeni ezintathu.

Kuthiwa abakwaSouth African Red Cross Society nenhlangano i- Al-Imdaad baveze ukuthi nabo bakulungeke ukusiza uma benxuswa ukwenze njalo.