Ibhantshi ligcwale umoya emaphoyiseni ‘ agwazisayo’
AMALUNGU amabili eRoad Traffic Inspectorate (TRI) azinze eNewcastle, axoshwe wumnyango Isithombe: SIGCINIWE
AKHONJWE indlela amaphoyisa amabili omgwaqo wuMnyango wezokuThutha KwaZulu-Natal, ngemva kokusolwa ngokugwazelwa ngabashayeli bamaloli.
Umnyango uthi inhloso ngesinqumo sokubaxosha wukuqinisa impi yokulwa nezinga eliphezulu lezingozi ezidalwa ngamaloli emigwaqweni, kanti kuthiwa kutholakale ukuthi amaphoyisa abegwazelwa ngabashayeli bamaloli.
Amalungu amabili eRoad Traffic Inspectorate (TRI) azinze eNewcastle, axoshwe wumnyango ngemuva kophenyo oluqalwe ngonyaka wezimali ka-2018/19.
Bobabili babanjwe nemali okukholakala ukuthi bayithole ngobugebengu, kuthiwa bebethatha imali kubashayeli bamaloli bese bebavumela ukuthi baqhubeke nohambo yize bephule imithetho yemigwaqo.
Umnyango uphothule uphenyo ngenyanga edlule wase unikeza amaphoyisa isaziso sokuwaxosha. Icala lawo lizoqulwa enkantolo ngemva kokuhoxiswa okwekhashana ngenkathi kusaqhubeka uphenyo.
Amaphoyisa axoshiwe aboshwe ngemuva komsebenzi wethimba elihlanganisa iPublic Transport Enforcement Services, aweziNhloli naweSAPS eNewcastle.
Khonamanjalo uphenyo lwaseNewcastle, mayelana nezinsolo zokungahambi kahle kwezinto esikhungweni sokuhlolela amalayisensi okushayela (iDLTC), luholele ekutheni abahloli abayisithupha babekwe amacala.
Abanye babekwe icala lokunikeza abokufika ama-learners licence kodwa umnyango osuwachithile.
Zibakhalele ngemva kokuboshwa kwabasolwa abathathu ngesonto eledlule eHammersdale, okukholakala ukuthi bebebhalela labo abafake izicelo zama-learners ukuze bathole imali.
Ephawula ngezigameko uNgqongqoshe wezokuThutha, ukuPhepha nokuXhumana koMphakathi uMnuz Sipho Hlomuka, uthe umnyango uthatha izinyathelo ezinqala mayelana nezikhulu zomgwaqo ezithintekayo emacaleni okugwazelwa.
"Lawo maphoyisa omgwaqo abukela phansi imizamo yesifundazwe yokulwa nesihlava sokushona kwabantu emigwaqweni futhi awanayo indawo emnyangweni wethu. Ukuthi amaphoyisa womabili asexoshiwe kuyinkomba yokuthi sizimisele ngokusiphula ama-aphula abolile phakathi kwethu. Njengoba sesisondele isikhathi samaholidi, sigxile ekubhekeni abashayeli abephula umthetho. Uhlelo lwethu luhlose ukunciphisa izinga lokufa kwabantu emigwaqweni. Ukufeza lokhu, sidinga izikhulu zomgwaqo eziziphethe kahle futhi ezineqiniso,” kusho uHlomuka.
Umnyango uphinde unxuse amalungu omphakathi ukuthi uwabike wonke amaphoyisa acela ukugwazelwa ngesikhathi enza umsebenzi wawo.