Kukhuzwe udlame emahostela ngengoma

KUSETSHENZISWE ingoma, umculo nomdanso ukukhuthaza ukuhlalisana ngokuthula nokuzwana emahostela, emcimbini wengoma obuseGlebelands Stadium, eMlaza, izolo.

UMnuz Mthembiseni Thusi wenhlangano, Ubunye BamaHostela, ebihlele lo mcimbi, uthe ukubulalana kwabantu emahostela ikakhulu eGlebelands eminyakeni edlule, kwenze bafisa ukwenza okuthile ukulwa nokukuqeda nya.

"Amahostela asedume kabi ngenxa yodlame lokubulalana kwabantu nokuhlukunyezwa kwabesifazane okuqale eminyakeni edlule.

"Yingakho senze lo mcimbi ngenhloso yokuhlanganisa abantu, sishumayele ivangeli lobunye nokuzwana sisebenzisa ingoma nobuciko obehlukene," kuchaza uMnuz Thusi.

Uthe kubajabulise kakhulu ukuphuma kwabantu ngothi lwabo emcimbini, kanjalo nabahlali basemahostela amane abasebenzisane nawo ukwenza lo mcimbi - okuyihostela laseWema, KwaMashu, Dalton neClermont.

UMnuz Lahliwe Mkhonde ongomunye wabaphathi behostela iGlebelands, uncome inhlangano Ubunye BamaHostela ngomsebenzi omuhle ewenzile ngokuhlela lo mcimbi.

Emcimbini bekukhona neMeya yoMasipala wesiFunda iKing Cetshwayo, uMnuz Thami Ntuli, naye ofike washumayela ivangeli elifanayo lobunye, ukuthula nokuzwana kubahlali basemahostela.

“Kuyajabulisa ukubona umcimbi ofana nalona ikakhulu ngoba ikhwelo lawo wukushumayela ivangeli lokuthula emahostela asedume kabi ngenxa yodlame obelwenzeka eminyakeni edlule,” kusho uMnuz Ntuli.

Kunandise Izintombi ZikaMaNtombela, Zamokuhle, Totoba, AmaZayoni, Abafana Bomntwana, Zanemali Club, Bullet, Ithwasa Lekhansela noKhuzani ukukha nje phezulu.