Umndeni ubanjwe inkunzi usathandaza
UTHOLWE nesibhamu sohlobo lweeRevolver umlisa obambe inkunzi umndeni obuthandaza Isithombe: ESIGCINIWE
ZIMKHALELE owesilisa obanjwe edla phansi nokhiye bemoto neselula ngemva kokwebela umndeni usabambe isiguqo ebusuku.
Lo msolwa (25) ubanjwe eBerea eThekwini, ngemva kokuthi elinye ilungu lomndeni lizithele kuye ngaphandle eqeda ukuvulela amanzi empompini osemnyango.
Okhulumela amaphoyisa KwaZulu-Natal, uLieutenant Colonel Nqobile Gwala, uthe isigameko senzeke ngaphambi kwezithuba zika-8 ebusuku.
"Owesilisa uvulele amanzi empompini ongaphandle, lithe uma liphuma elinye ilungu lomndeni liyobheka wase engena ngaphakathi endlini. Umsolwa ungene endlini wathelekela amalungu omndeni, wathatha ukhiye wemoto, imali namaselula," kuchaza uLieutenant Colonel Nqobile Gwala.
Kuthiwa umsolwa ubesebhaca ngezitebhisi zendlu yokugeza. ULieutenant Colonel Gwala uthe umndeni uthinte amaphoyisa ngokushesha amfica esabhacile nezimpahla ezebiwe.
"Amaphoyisa abophe umsolwa nesibhamu sohlobo lwerevolver nezinye izimpahla ezebiwe. Uzovela ngoMsombuluko eNkantolo kaMantshi eThekwini, ngecala lokubamba inkunzi," kuchaza uLieutenant Colonel Nqobile Gwala.