UMncwango uthembisa ukukhulisa i-Action SA eKZN

USIHLALO omusha we-Action SA KwaZulu-Natal, uMnuz Zwakele Mncwango, uzibophezele ukuthi uzokhulisa leli qembu kulesi sifundazwe abuyise nalabo abashiya leli qembu.

UMncwango omenyezelwe nguMengameli waleli qembu, uMnuz Herman Mashaba, esithangamini sabezindaba, uthe ufuna abantu baphephe esifundazweni. Uthe ziningi izinto ezingalungile ezidinga leli qembu lizenze ngokushesha.

“Ngiyajabula ukuthi ngiyingxenye ye-Action SA manje, ngizimisele ukulikhulisa kulesi sifundazwe. Baningi abantu abalishiya asebethembise ukuthi bazobuya.”

Uthe lesi sifundazwe asilula ngakho uma ufuna ukusilawula kudingeka uhlanganise izinhlanga ezehlukene.

“Ngeke usibuse uma kungukuthi uzosihlukanisa. Kudingeka uhlanganise zonke izinhlanga uma ufuna ukusiphatha ngempumelelo.”

Uthe uzosebenzisana nazo zonke izinhlaka okubalwa abaholi bomdabu, abamabandla ahlukene kanjalo nezinhlaka ezithinta ezokuphepha.

Emukela uMncwango, uMashaba uthe usebenze naye besakwi-DA wathi uyazinikela entweni ayenzayo.

Uthe ngesonto elizayo, uzobe ememezela usihlalo we-Action SA eWestern Cape.

“Bazobe sebephelele ezweni lonke osihlalo uma sengimemezela owokugcina ngesonto elizayo. Siyamamukela uMncwango kwi-Action SA ngoba siyazi uzozikhandla.”