Bavele enkantolo ababambe inkunzi

BAVELE enkantolo izolo abasolwa ngokubamba inkunzi indawo yebhizinisi eMoholoholo eSikhaleni ngempelasonto.

Okhulumela amaphoyisa esifundazweni uLt Colonel Nqobile Gwala, uthe abasolwa abathathu bangene endaweni yebhizinisi ngoLwesihlanu ebusuku bakhomba ngezibhamu abasebenzi namakhasimende. Uthe bafune ngenkani amaselula, imali kanye nezikhiye zemoto kumakhasimende. “Amaphoyisa abikelwe ngokushesha ngalesi sigameko abe esevala zonke izintuba zokuphuma nezingena kule ndawo yebhizinisi,” kuchaza uLt Colonel Gwala.

Uthe abasolwa ababili abeneminyaka engu 31 no 34 baboshwe besendaweni yesehlo, oyedwa kubo utholwe nesibhamu nezinhlamvu okungekho emthethweni. Kutholwe imoto ebihamba abasolwa, amaselula amathathu abasolwa kanye nezikhwama ezimbili zemali nazo obekungezabasolwa. Kuphinde kwatholwa amanye amaselula amahlanu nemali engadalulwanga ukuthi ibingakanani. ULt Gwala uthe abasolwa ababili babaleke nesamba semali esingaziwa kanye nokhiye bemoto yekhasimende. Uthe abasolwa basathungathwa kanti ababoshiwe bavele enkantolo izolo.