Izinsuku ziyeza ngisazokhuluma ngikhulumisise - Zuma
OKHULUMELA iJacob Zuma Foundation uMnuz Mzwanele Manyi nowayengumengameli wezwe uMnuz Jacob Zuma obonge bonke abafike enkantolo bezemeseka Isithombe: TWITTER
OWAYENGUMENGAMELI uMnuz Jacob Zuma uthi kuningi asazokukhuluma. UZuma ubekhuluma kanje eNkantolo eNkulu yaseMgungundlovu njengoba bekuwusuku lokuqala lokulalelwa kwecala lapho ezishushisela yena umshushisi woMbuso, uBilly Downer nentatheli uKaryn Maughan.
Ethula inkulumo yakhe, uveze ukuthi akasezothula.
“Izinsuku ziyeza ngisazokhuluma impela ngikhulumisise. Ngike ngakhuluma kulezi zinsuku ezedlule, ngikhuluma kancane kodwa ngisazokhulumisisa,” esho ngaphandle kwenkantolo.
UZuma usola uDowner noMaughan ngokuphula umthetho ngokuveza imininingwane ebucayi ngesimo sempilo yakhe.
UZuma uthe ngeke ahlale agoqe izandla ebe ebona kuphulwa umthetho. Uthe okuhle kulokhu useyakwazi ukuthi azifikele mathupha enkantolo kwazise sesiphelile isigwebo sezinyanga ezingu-12.
Ekhuluma ngesigwebo uZuma uthe kubalulekile ukuthi alimele iqiniso futhi akaqali ukuboshwa kodwa uma eboshelwa iqembu lakhe akunankinga.
UZuma ubonge ubuholi obusha be-ANC esifundazweni obuphume ukuzomeseka.
UZuma uphethe inkulumo yakhe ngengoma yodumo ethi Umshini wam.
WATCH: A handful of former president Jacob Zuma singing struggle songs outside Pietermaritzburg high court. Zuma is attending his case against state prosecutor Billy Downer and News24 legal journalis Karryn Maughan for allegedly leaking his medical records @DailyNewsSA pic.twitter.com/QZJO9w4SHN
— Willem phungula (@PhungulaWillem) October 10, 2022