Bakhathazwa ukuhlaselwa kweziteshi zamaphoyisa

INYUNYANA yamaphoyisa nojele bakhathazekile ngabakuchaze ngokwanda kwezigameko zokuhlaselwa kweziteshi zamaphoyisa kwebiwe izibhamu nezinhlamvu okugcina zisetshenziswa ezenzweni zobugebengu.

Lokhu kuvezwe yiPolice and Prisons Civil Rights Union (Popcru) ethe seziyisikhombisa izigameko ezibikiwe kulo nyaka zokuhlaselwa kweziteshi zamaphoyisa.

Muva nje kuthiwa izinswelaboya zigasele esiteshini samaphoyisa saseDevon, Ekurhuleni, eGauteng, zafike zakhomba ngezibhamu amaphoyisa amathathu abekade esebenza.

Lezi zigebengu, ezithungathwayo, kuthiwa ziphuce amaphoyisa izibhamu zawo zomsebenzi zase ziyawaqhuba kwayiwa lapho ebekugcinwe khona izibhamu kwashaqwa ezinye.

Kuthiwa lezi zigilamkhuba zishaye zachitha nezibhamu okungamaR5 amathathu, ama-9mm ayisikhombisa nenqwaba yezinhlamvu.

Okhulumela iPopcru kuzwelonke, uMnuz Richard Mamabolo, uthe lezi zibhamu kugcina sekwenziwa ngazo ubugebengu okubalwa kubona obokubanjwa kwezimoto ezithwala imali.

UMamabolo uthe lo mkhuba uya ngokwanda ikakhulukazi eziteshini ezisezindaweni zasemakhaya nasemalokishini ezingavikelekile.

Le nyunyana ikhale nangokungalingani kwendlela umnyango wamaphoyisa owaba ngayo izinsizakusebenza eziteshini zamaphoyisa.

“Uthola ukuthi eziteshini zamaphoyisa ezisezindaweni zabadla izambane likapondo kunabasebenzi nezinsizakusebenza ezanele namakhamera. Lokhu awukuboni eziteshini ezisemalokishini nasezindaweni zasemakhaya ezinabantu abaningi abadinga usizo lwamaphoyisa,” kusho uMamabolo.

Le nyunyana iphonsele inselelo umnyango wamaphoyisa ukuthi wabe izinsizakusebenza ngendlela efanayo eziteshini futhi wandise isibalo samaphoyisa, ikakhulukazi lawo asebenza ebusuku.

Bafuna kulungiswe ngokushesha izimoto zokusebenza zamaphoyisa athe zifile, zigcwele emagaraji.

UMamabolo uthe kusanda kuhlaselwa iziteshi ezimbili eLimpopo, ezimbili eMpumalanga, esisodwa eNorthern Cape nezimbili eGauteng.