I-Sadtu yeseka i-ANC okhethweni lwango-2024
UMENGAMELI we-ANC nezwe uMnuz Cyril Ramaphosa okulindeleke ukuthi akhulume emhlanganweni weSadtu eGoli Isithombe:Ayanda Ndamane African News Agency ANA
ENYE yezinyunyana ezinkulu ngaphansi komfelandawonye wezinyunyana zabasebenzi iCosatu, isiveze ukuthi mancane amalungu eCosatu avotela ukuthi iSACP ingenele ukhetho ngokuzimela ngo-2024.
UMengameli weSadtu, uMnuz Magope Mapila, uthe amalungu amaningi awazange asivotele isiphakamiso ngoba kunesivumelwano sokuvota ne-ANC.
Ekhuluma emhlanganweni iNational General Council (NGC) weSadtu eqhubeka eGoli, okulindeleke ukuthi kukhulume noMengameli Cyril Ramaphosa, uthe bangu-788 abavotela ukuthi iSACP ingenele ukhetho ngokuzimela.
Uthe akukwazi ukuthi emalungwini evile ku-1800 ayevota engqungqutheleni yeCosatu ebingesonto eledlule, kungathathwa isinqumo sengcosana ehambisana nesiphakamiso.
“Amalungu angu-1066 kawazange aseseke lesi siphakamiso. Ngakho kusho ukuthi iCosatu isamile ekutheni ivota ne-ANC njengoba singamadlelandawonye sihlale sivota noKhongolose.”
Uthe kumele kwesekwe i-ANC okhethweni oluzayo ngoba uma kungenjalo inkululeko eyazuzwa kanzima ingashabalala.
“Kukhona ingcosana yamalungu engasafuni lutho oluthinta i-ANC. Yingakho kwaze kwaba nesehlakalo sokuxoshwa kukasihlalo we-ANC, uMnuz Gwede Mantashe, owagcina engayethulanga inkulumo yakhe engqungqutheleni yeCosatu.”
Uthe akumele bakhale uma amalungu e-ANC esenza okufanayo, esechitha abaholi bezinyunyana kanjalo nabe-SACP emihlanganweni ye-ANC.
Uveze ukuthi uRamaphosa uzokhuluma emhlanganwenni weSadtu osongwa kusasa.