‘Hamba Gwede, asinamali’

KUHLAKAZEKE ingqungquthela yeCosatu kungalindelekile amalungu ayo evimba uSihlalo we-ANC, uMnuz Gwede Mantashe, ukuba athule inkulumo yakhe.

Namuhla wusuku lokuqala lwale ngqungquthela ezothatha izinsuku ezine eGallagher Estate eMidrand.

Le ngqungquthela ivulwe ngumengameli weCosatu obheke ihlandla lesibili, uNksz Zingiswa Losi, odalule ukuthi abasebenzi banezikhalazo eziningi ngezinto ezenzeka kuleli okubalwa kuzo inkinga kagesi, umnotho ontekenteke kanjalo nokwentuleka kwemisebenzi.

Kuthe sekumele kukhulume uMantashe, avuka ngolaka amalungu eCosatu ezwakala ngengoma ethi, “Hamba Gwede, asinamali.”

Kudingeke ukuba uMantashe avikelwe ngabaqaphi bakhe namanye amalungu e-ANC ayingxenye yale ngqungquthela ngoba bekubonakala ukuthi abasebenzi badinwe bagane unwabu futhi akukho abafuna ukukuzwa okuphuma kuyena.

Abanye abasebenzi abathe qaphu kwabezindaba, baveze kuthi bakhathele izithembiso ezingafezekiswa futhi bafuna imali yabo.

2000 Cosatu members have booed ANC Secretary General Gwede Mantashe off stage ahead of delivering his message at the Cosatu National Congress. Member are refusing to be addressed by Mantashe chanting “asinamali” “hamaba-Gwede”. They r calling for an end to austerity #sabcnews pic.twitter.com/LEp4tXYkli

— Naledi Ngcobo (@NalediJ) September 26, 2022

UNksz Lindiwe Sisulu unxuse abezindaba ukuthi bangamxini ngemibuzo okwamanje uMantashe. Uthe uzobuye akhulume nabezindaba futhi bonke njengoba belapha bamele i-ANC, bazosenza isikhathi sokukhuluma kahle nabezindaba ngokwenzekayo.

“Sinicela kahle, sinicela kahle, sidinga ukuzilungisa thina,” kusho uSisulu.