‘Abenzanga kahle ubuholi obuphumayo be-ANC eKZN’
Ilungu lesigungu esiphezulu kwi-ANC KwaZulu-Natal, uMnuz Siboniso Duma Isithombe: Sigciniwe
ABAHLAZIYI bezepolitiki babona abalandeli owayengumengameli, uJacob Zuma, bezokuba namandla nethonya engqungqutheleni yokukhetha ubuholi be-ANC KwaZulu-Natal.
Abahlaziyi bezepolitiki bathi loyo ozokwazi ukuthola amavoti ezithunywa ezeseka uZuma, nabazibiza ngeRadical Economic Transformation (RET) Forces, nguyena ozokudla umhlanganiso.
Ingqungquthela yokukhetha ubuholibe-ANC KwaZulu-Natal izoqala kusasa eThekwini, isongwe ngeSonto. Amagama avelayo embangweni wokuhola, ngelikaSihlalo wale nhlangano esifundazweni, uMnuz Sihle Zikalala, elikaMgcinimafa wale nhlangano esifundazweni, uNkk Nomusa Dube-Ncube nelelungu lesigungu esiphezulu esifundazweni, uMnuz Siboniso Duma.
Kuphinde kuvele igama likasomabhizinisi ongumengameli waMaZulu FC, uMnuz Sandile Zungu, nelalowo owayengumqondisi-jikelele ehhovisi likandunankulu waKwaZulu-Natal, uMnuz Nhlanhla Ngidi.
Umhlaziyi wezepolitiki ozinze eNyuvesi yaseWestern Cape, uSolwazi Bheki Mngomezulu, uthe ozokwazi ukunqoba lo mjaho yiloyo ozokweseka abeRET.
“Uma uzobheka izingqungquthela zokukhetha ubuholi bezifunda KwaZulu-Natal, cishe kweyizisishagalolunye zazo kuphumelele abeRET. Maningi amathuba okuthi loyo ozokwesekwa abeRET anqobe.”
UMngomezulu uthe kuzokuba nzima ukuthi uZikalala athole ukwesekwa ngabeRET.
“Kunomuzwa wokuthi uyishaya ngapha,ayishaye ngapha. Uke waziqhelelanisa nezinto ezithinta uZuma kodwa sambona ephinde ebuya. Lokhu kuzokwenza ukuthi kube nzima ukuthi bamseke.”
Umhlaziyi wezepolitiki ozimele, uMnuz Protas Madlala, uthe ukungenzi kahle kobuholi obuphumayo yikhona okwenza ukuthi babe baningi abangenele umbango wezikhundla.
“Lobu holi obuphumayo abuzange benzekahle. Ukungenzi kahle kwabo kucace kakhulu ngesikhathi kuphuma imiphumela yokhetho lohulumeni basekhaya lwangonyaka owedlule. Le miphumela ibashiye benovalo lokuthi kazi kuzokwenzakalani ngo-2024. Yingakho sekusukuma nesinedolo, bonke sebefuna ukuphatha.”
UMadlala uthe izehlakalo ezenzeke esifundazweni okubalwa kuzo izibhelu zangonyaka owedlule nokuhlasela kwezikhukhula nakho kufakele ingcindezi ubuholi obuphumayo.
“Lezi zinto azizange zenzeke kwezinye izifundazwe, zenzeke KwaZulu-Natal kuphela. Lokhu kube yishwa eliqondane nobuholi obukhona.”
UMadlala uthe ukuba khona kwabantu abaningi abangenele ukhetho kwenza kubenzima ukuqagula ukuthi ngubani ozonqoba.
“Lokhu kusho ukuthi bonke bazocazelanaamavoti. Kwenza kube nzima ukusho ukuthi ngubani ozonqoba ngaphandle uma kungase kube khona abahoxayo.”
Umhlaziyi oseNyuvesi yaKwaZulu-Natal, uDkt Fikile Vilakazi, uthe ukwanda kwabangenele umbango wesikhundla kunciphisa amathuba kaZikalala okubuya.
"Wonke umuntu ufuna ukuzibonakalisa, bafuna ukumkhipha. Kunzima ukuthiabuyele."
UDkt Vilakazi uthe ukuba khona kwamagama amaningi angenele umbango wezikhundla kukhombisa uqhekeko kwi-ANC KwaZulu-Natal. Uthe iKwaZulu-Natal izokuya engqungqutheleni kazwelonke ihlukene, nathe kuzonciphisa amathuba okuthi kubekhona umholi oqhamuka KwaZulu-Natal ozoqokelwa esikhundleni ubuholi.